ស្ទឹងត្រែង ៖ លោក ស្វាយ សំអ៊ាង អភិបាលខេត្តស្ទឹងត្រែង បានជំរុញឱ្យមន្ត្រីជំនាញ នៃមន្ទីរសាធារណការ និងដឹកជញ្ជូនខេត្តស្ទឹងត្រែងសាងសង់ស្ពានបេតុងអូរបាដើម ឱ្យបានឆាប់រួចរាល់ ដើម្បីបើកដំណើរការជូនប្រជាពលរដ្ឋនៅស្រុកសេសានបានឆ្លងកាត់មានសុវត្ថិភាពបន្ទាប់ពីស្ពានចាស់មានសភាពទ្រុឌទ្រោម។

ក្នុងឱកាស ចុះពិនិត្យសកម្មភាពសាងសង់ស្ពានបេតុងថ្មីនៅឃុំសាមឃួយស្រុកសេសាន ខេត្តស្ទឹងត្រែង នាថ្ងៃទី១៧ តុលា នេះ  លោក ស្វាយ សំអ៊ាង បានថ្លែងថា នេះជាកត្តាចាំបាច់ណាស់សម្រាប់បងប្អូនប្រជាពលរដ្ឋយើងក្នុងការប្រើប្រាស់ចំពោះមុខ ចេញចូលពីតំបន់មួយទៅតំបន់មួយទៀត។

លោកបន្តទៀតថា ស្ពានបេតុងថ្មីនេះ បានបង្កលក្ខណៈងាយស្រួលសម្រាប់បងប្អូនកសិករយើងដឹកផលកសិកម្ម មកកាន់ទីផ្សារមានសុវត្ថិភាពទើបប្រមុខរាជរដ្ឋាភិបាលបានផ្តល់ជាចំណងដៃជូនប្រជាពលរដ្ឋសម្រាប់ឆ្នាំ២០២២។

លោក បានបញ្ជាក់ថា «យើងទាំងអស់គ្នាធ្វើម៉េចខិតខំបន្តអភិវឌ្ឍ នូវសមិទ្ធផល ទាំងឡាយដែលជាគំរូរបស់រាជរដ្ឋាភិបាលក្តី ជាគំរូរបស់បណ្តាមន្ទីរជំនាញក៏ដូចជាអាជ្ញាធរ រដ្ឋបាលខេត្តក្តី យើងខំបន្តដោះស្រាយបញ្ហានេះ នៅកន្លែងដទៃទៀតដើម្បីធ្វើយ៉ាងណា ឱ្យការតភ្ជាប់នូវប្រព័ន្ធផ្លូវរបស់យើងនេះ  សម្រាប់ បង្កលក្ខណៈងាយស្រួលជូនទៅដល់ប្រជាពលរដ្ឋយើងនៅតាមតំបន់ឆ្ងាយៗទៀត ព្រោះថាយើងឃើញហើយថាតម្រូវការរបស់ប្រជាពលរដ្ឋ មានច្រើន  ហើយ បញ្ហារបស់យើងការខ្វះខាតយើងក៏មានបន្ត អ៊ីចឹងយើងក៏ខិតខំបន្ត"។

ដោយឡែក លោក សរ គឹមណាត ប្រធាន មន្ទីរសាធារណការនិងដឹកជញ្ជូនខេត្ត បានបញ្ជាក់ថា បញ្ហាប្រឈមនេះមន្ទីរសាធារណការ នឹងខិតខំប្រឹងប្រែងចូលរួមជាមួយរដ្ឋបាលខេត្ត ដើម្បីអភិវឌ្ឍឱ្យសម្រេចនូវសមិទ្ធផល នានាដែលរាជរដ្ឋាភិបាលក៏ដូចជាអាជ្ញាធរខេត្តបានរៀបចំឡើង ។

លោកបន្តថា ស្ពានបេតុងដែលកំពុងស្ថាបនានេះសម្រេចបាន៩០%ភាគរយហើយៗគ្រោងនឹងបញ្ចប់ការសាងសង់នៅចុងឆ្នាំ២០២១នេះ ឱ្យបានតាមសំណូមពររបស់លោកអិបាលខេត្ត ដើម្បីបើកឱ្យប្រជាពលរដ្ឋយើងបានធ្វើចរាចរណ៍ឆ្លងកាត់ប្រកបដោយសុវត្ថិភាពក្នុងការធ្វើដំណើរទៅមក។

សូមបញ្ជាក់ថា ស្ពានបេតុងថ្មីកំពុងស្ថាបនានេះ  ឈ្មោះស្ពានអូរបានដើម ស្ថិតនៅក្នុងភូមិ ឃុំសាមឃួយស្រុកសេសាន ខេត្តស្ទឹងត្រែង មានប្រវែង៦០ម៉ែត្រ ទទឹង៨ម៉ែត្រ ហើយតភ្ជាប់ទៅកាន់តំបន់ ទេសចរណ៍ក្នុងស្រុកសេសាននេះ ផងដែរ៕