ភ្នំពេញ  ៖  សម្ដេច  ទៀ បាញ់ ឧបនាយករដ្ឋមន្ត្រី  រដ្ឋមន្ត្រីក្រសួងការពារជាតិ  បានថ្លែងថា  កម្ពុជា -ឡាវ  មានកិច្ចសហប្រតិបត្តិការយ៉ាងជិតស្និទ្ធ ទាំងក្នុងក្របខ័ណ្ឌទ្វេភាគី និងពហុភាគី ដើម្បីនាំមកនូវ សន្តិភាព  និងការអភិវឌ្ឍប្រកបដោយចីរភាព  ជាពិសេស  ផលប្រយោជន៍ទៅវិញ  ទៅមក  នៃប្រជាជាតិទាំងពីរ។យោងតាមគេហទំព័រហ្វេសប៊ុក  សម្ដេចតេជោ  ហ៊ុន  សែន  នាយករដ្ឋមន្ត្រី នៃ កម្ពុជា ។ 

ក្នុងពិធីប្រគល់-ទទួលអំណោយ  សំម្ភារបិរក្ខាវេជ្ជសាស្ដ្រពីរាជរដ្ឋាភិបាល  និងប្រជាជនកម្ពុជា  ជូនចំពោះរដ្ឋាភិបាល  និងប្រជាជនឡាវ  ដេីម្បីបង្ការទប់ស្កាត់ការរីករាលដាលជំងឺកូវីដ-១៩  នាថ្ងៃទី១៦  ខែវិច្ឆិកា  ឆ្នាំ ២០២០  នៅប្រទេសឡាវ  សម្តេច  ទៀ  បាញ់ បានបញ្ជាក់ថា កម្ពុជា និងឡាវ  មានចំណងមិត្តភាព ដ៏យូរអង្វែង ដែលថ្នាក់ដឹកនាំគ្រប់កម្រិតនៃប្រទេសទាំងពីរកំពុងបន្តពូនជ្រុំ និងពង្រឹងឱ្យកាន់តែរឹងមាំថែមទៀតជារៀងរាល់ថ្ងៃ។ 

សម្ដេច  មានប្រសាសន៍ថា  "ប្រជាជនយើងទាំងពីរបានកៀកស្មាគ្នា តស៊ូប្រយុទ្ធប្រឆាំងនឹងរបបអាណានិគមនិយម និងចក្រពត្តិនិយម ដើម្បីទទួលបានឯករាជ្យ អធិបតេយ្យភាពជាតិ សេរីភាព និងសិទ្ធិស្វ័យសម្រេចរៀងៗខ្លួន។បច្ចុប្បន្ន កម្ពុជា និងឡាវក៏មានកិច្ចសហប្រតិបត្តិការយ៉ាងជិតស្និទ្ធ ទាំងក្នុងក្របខ័ណ្ឌទ្វេភាគី និងពហុភាគី ដើម្បីនាំមកនូវ សន្តិភាព ស្ថិរភាព សន្តិសុខ ការអភិវឌ្ឍប្រកបដោយចីរភាព និងផលប្រយោជន៍ទៅ វិញទៅមកនៃប្រជាជាតិយើងទាំងពីរ"។ 

ជាងនេះទៅទៀ ត   សម្ដេច  ទៀ  បាញ់  បានជឿជាក់ថា ទំនាក់ទំនងល្អប្រសើរជាប្រពៃណី និងកិច្ចសហប្រតិបត្តិការវាងប្រជាជាតិទាំងពីរ នឹងកាន់តែមានភាពស៊ីជម្រៅ រីកចម្រើនរឹងមាំ នាំមកនូវភាពសុខដុម និងវឌ្ឍនភាពសេដ្ឋកិច្ច-សង្គមជានិរន្តរ៍ ដល់ប្រជាជនទាំងពីរ ដែលនឹងរួមចំណែកផងដែរដល់សន្តិភាព ស្ថិរភាព និងការអភិវឌ្ឍនៅក្នុងតំបន់។ 

ឆ្លៀតឱកាសនោះ  រដ្ឋមន្ត្រីក្រសួងការពារជាតិ  ក៏បានលេីកឡេីងថា  ការចូលរួមវិភាគទានថ្ងៃនេះ ដើម្បីជួយទប់ស្កាត់ការផ្ទុះឡើងនៃជំងឺកូវីដ១៩ នៅក្នុងប្រទេសឡាវ គឺជាកាយវិការបង្ហាញនូវមនោសញ្ចេតនា និងសាមគ្គីភាព របស់ប្រជាជនកម្ពុជាជាមួយប្រជាជនឡាវ នៅក្នុងកាលៈទេសៈដែលពិភពលោក ទាំងមូលកំពុងជួបនឹងបញ្ហាប្រឈមដែលមិនធ្លាប់មានពីមុនមក លើសុវត្ថិភាពនៃសុខភាព និងសន្តិសុខមនុស្សជាតិ៕EB