អាមេរិក ៖ សង្គ្រាមវោហាសាស្ត្ររវាងបេក្ខភាពប្រធានាធិបតីមកពីគណបក្សសាធារណរដ្ឋ លោក ដូណាល់ ត្រាំ និងគូប្រជែងមកពីគណបក្សប្រជាធិបតេយ្យ លោកស្រី កាម៉ាឡា ហារីស នឹងប៉ះទង្គិចគ្នាជាលើកដំបូងក្នុងជំនួបជជែកដេញដោលគ្នានៅថ្ងៃទី១០ ខែកញ្ញា ដើម្បីប្រជែងកៅអីប្រធានាធិបតីសហរដ្ឋអាម៉េរិកថ្មី។នេះបើតាមការចេញផ្សាយដោយសារព័ត៌មានរ៉យទ័រ នៅថ្ងៃទី ៩ ខែសីហា ឆ្នាំ២០២៤។

លោក ត្រាំ បានលើកឡើងថា ខ្លួនចង់ឱ្យមានការជជែកដេញដោលបន្ថែមនៅថ្ងៃទី៤ ខែកញ្ញា និងថ្ងៃទី២៥ ខែកញ្ញា ដែលនឹងចាក់ផ្សាយនៅលើកញ្ចក់ទូរទស្សន៍ Fox និង NBC។ ដោយឡែក លោកស្រី ហារីស បានឱ្យដឹងថា លោកស្រីកំពុងទន្ទឹងរង់ចាំការជជែកដេញដោលនៅថ្ងៃទី១០ ខែកញ្ញា ដោយបន្ថែមថា លោកស្រីបើកចំហក្នុងការពិភាក្សាបន្ថែមទៀត ប៉ុន្តែមន្ត្រីយុទ្ធនាការបានរំលឹកឡើងវិញនូវជំហររបស់ពួកគេថា ការជជែកដេញដោលរបស់ទូរទស្សន៍ Fox នៅថ្ងៃទី៤ ខែកញ្ញា មិនត្រូវបានរៀបចំឡើងនោះទេ។ 

សូមបញ្ជាក់ថា ការពិភាក្សាលើការជជែកដេញដោលនាពេលអនាគត អាស្រ័យលើការចូលរួមរបស់លោក ត្រាំ នៅក្នុងការជជែកដេញដោលថ្ងៃទី១០ ខែកញ្ញា នៅលើទូរទស្សន៍ ABC៕