ស្ថានឯកអគ្គរាជទូតកម្ពុជាប្រចាំសាធារណរដ្ឋកូរ៉េជូនដំណឹង ឱ្យសាធារណជនទាំងអស់ដើម្បីចូលរួមបង្ការ និងទប់ស្កាត់ការរីករាលដាលនៃជំងឺ Covid-19 ដោយអនុវត្ត តាមវិធានការណ៍ថ្មីរដ្ឋាភិបាលកូរ៉េ ដែលនឹងចូលជាធរមានចាប់ពីថ្ងៃទី ០១ ខែមេសា ឆ្នាំ២០២០ សម្រាប់អ្នកធ្វើដំណើរចូលប្រទេសកូរ៉េទាំងអស់ ដូចខាងក្រោម ៖

១- ជនជាតិកូរ៉េ និងជនបរទេសទាំងអស់ដែលចូលមកកូរ៉េ គឺត្រូវស្ថិតនៅក្រោមការដាក់ឱ្យនៅដាច់ដោយឡែក (Self-Quarantine) រយៈពេល ១៤ថ្ងៃ និងតម្រូវឱ្យតម្លើងកម្មវិធី Self-Quarantine Safety and Protection App ក្នុងទូរស័ព្ទដៃ។

២- អ្នកធ្វើដំណើរចូលកូរ៉េ (រួមទាំងអ្នកដំណើរមកពីបណ្តាប្រទេសអឺរ៉ុប) ដែលឡើងកម្តៅខ្លួន និងមានរោគសញ្ញាផ្សេងទៀតពាក់ព័ន្ធនឹងជំងឺ Covid-19 ត្រូវបញ្ជូនទៅកន្លែងដាក់ឱ្យនៅដាច់ដោយឡែកនៅឯអាកាសយាន្តដ្ឋានដើម្បីធ្វើតេស្តរកវីរុស Covid-19 ។ ក្នុងករណីពិនិត្យឃើញវិជ្ជមាន នឹងត្រូវបញ្ជូនទៅមន្ទីរពេទ្យដើម្បីព្យាបាល និងតាមដាននៅមជ្ឈមណ្ឌលព្យាបាល។ ករណីពិនិត្យឃើញអវិជ្ជមាន តម្រូវដាក់ឱ្យនៅដាច់ដោយឡែករយៈពេល ១៤ថ្ងៃ ដោយខ្លួនឯង។

៣- ចំពោះជនបរទេសដែលមានចេញជារោគសញ្ញាមួយចំនួន ហើយកាន់ប័ណ្ណស្នាក់នៅរយៈពេលវែង (Alien Registration Card) តម្រូវឱ្យស្ថិតនៅក្រោមការដាក់ខ្លួនឱ្យនៅដាច់ដោយឡែកនៅទីលំនៅរបស់ពួកគាត់។ ចំពោះជនបរទេសដែលកាន់ប័ណ្ណស្នាក់នៅរយៈពេលវែង ប៉ុន្តែពុំមានទីលំនៅច្បាស់លាស់ ឬជនបរទេសដែលមកធ្វើទស្សនកិច្ចរយៈពេលខ្លី តម្រូវដាក់ឱ្យនៅដាច់ដោយឡែកនៅកន្លែងដែលបានរៀបចំដោយរដ្ឋាភិបាលកូរ៉េ ដោយការចំណាយជាបន្ទុករបស់សាម៉ីខ្លួន។

៤- សម្រាប់មន្រ្តីការទូតដែលកាន់ទិដ្ឋាការ A1 និង A2 ឬជនបរទេសដែលកាន់ទិដ្ឋាការ A3 (Treaties) និងអ្នកដែលមានវិញ្ញាប័នប័ត្រលើកលែងការដាក់ឱ្យនៅដាច់ដោយឡែក (Isolation Exemption Certificate) ចេញដោយស្ថានទូត ឬស្ថានកុងស៊ុលកូរ៉េ ត្រូវបានលើកលែងការដាក់ឱ្យនៅដោយឡែក រយៈពេល១៤ថ្ងៃ ដោយមិនរាប់បញ្ចូលសមាជិកគ្រួសាររបស់គេ និងតម្រូវឱ្យធ្វើតេស្តរកវីរុស Covid-19 នៅពេលមកដល់អាកាសយាន្តដ្ឋាន។ ប្រសិនបើធ្វើតេស្តឃើញអវិជ្ជមាន អាជ្ញាធរសុខា ភិបាលកូរ៉េនឹងបន្តត្រួតពិនិត្យតាមដាន (Active monitoring) តាមកម្មវិធី Self-Diagnosis ជាប្រចាំ៕