វៀតណាម៖«នៅកម្ពុជា គ្មានសហគមន៍ណា ដែលជួបការលំបាកច្រើនដូចសហគមន៍ជនជាតិវៀតណាមភាគតិចនោះទេ។ នេះជាការលើកឡើងរបស់លោក ង្វៀន សួនហ៊្វុក ប្រធានាធិបតីវៀតណាម ទៅកាន់មន្រ្តីទូតវៀតណាម តំណាងពាណិជ្ជករវៀតណាម និង តំណាងសហគមន៍វៀតណាមនៅកម្ពុជា ដែលត្រូវបានដកស្រង់យកទៅចុះផ្សាយដោយសារព័ត៌មានរបស់វៀតណាមVNXPRESS នៅថ្ងៃទី២២ ខែធ្នូ ឆ្នាំ២០២១។
លោកបន្តថា «ការជួបការលំបាកដោយសារពួកគេ មានស្ថានភាពមិនច្បាស់លាស់អំពីភាពស្របច្បាប់ ហើយភាគច្រើនក្នុងចំណោមពួកគេ មិនមានឯកសារសម្គាល់ខ្លួនដូចជាអត្តសញ្ញាណបណ្ណ ឬលិ ខិតឆ្ល ងដែនជាដើម»។ ជាមួយគ្នានេះ មេដឹកនាំកំពូលរបស់វៀតណាមរូបនេះ បានសន្យាថា នឹងប្រឹងប្រែងជួ យប្រជាជនខ្លួន ដែលមិនទាន់ទទួលបានភាពស្របច្បាប់ ឲ្យឆាប់ទទួលបានភាពស្របច្បាប់នៅកម្ពុជា។
លោក ស៊ឹម ជី ប្រធានសមាគមន៍ខ្មែរ-វៀតណាមនៅកម្ពុជា បានជម្រាបព័ត៌មានដល់លោកប្រធានាធិបតី ង្វៀន សួនហ៊្វុក ថា«សហគមន៍ជនជាតិវៀតណាមប្រឈមការលំបាកជាច្រើន ដែលមិនធ្លាប់មាន ដោយសារវិធានការរដ្ឋាភិបាលកម្ពុជា ក្នុងការផ្លាស់ប្តូរទីលំនៅរបស់ពួកគេ»។ ក្នុងពាក់កណ្តាលឆ្នាំ២០២១នេះ សាលាក្រុងភ្នំពេញ បានចេញវិធានការតម្រូវឲ្យអ្នក ដែលមានផ្ទះលើផ្ទៃទន្លេ និងប្រកបរបរនេសាទលើផ្ទៃទន្លេ ក្នុងភូមិសាស្ត្ររាជធានីភ្នំពេញ រុះរើចេញទៅរស់លើគោក ឬកន្លែងណាផ្សេង។ ហេតុផលរបស់សាលាក្រុងភ្នំពេញ គឺដើម្បីស្តារបរិស្ថានតាមទន្លេឲ្យល្អប្រសើរឡើងវិញ។ ក្នុងចំណោមអ្នករស់នៅលើផ្ទៃទន្លេក្នុងរាជធានីភ្នំពេញ ដែលត្រូវតម្រូវឲ្យចាកចេញនោះ គឺភាគច្រើនជាជនជាតិវៀតណាម។
ទន្ទឹមនឹងនេះ លោក ស៊ឹម ជី បានស្នើសុំឲ្យប្រមុខរដ្ឋវៀតណាម ស្នើទៅរដ្ឋាភិបាលកម្ពុជាប្រញាប់ចេញលិខិតបទដ្ឋានគតិយុត្តិផ្លូវការ ស្តីពីសិទ្ធិប្រជាជនវៀតណាមភាគតិច ដែលបានចុះក្នុងបញ្ជីជាជនបរទេសរស់នៅក្នុងប្រទេសកម្ពុជា ព្រមទាំងឆាប់ចេញសេចក្តីសម្រេចទទួលស្គាល់ពួកគេជាជនបរទេសរស់នៅក្នុងប្រទេសកម្ពុជា និងផ្តល់បណ្ណស្នាក់នៅអចិន្ត្រៃយ៍ដល់ពួកគេ»។
ដោយសារច្បាប់កម្ពុជាអនុញ្ញាតឲ្យពលរដ្ឋខ្មែរទិញដីប៉ុណ្ណោះ ជនជាតិវៀតណាមរាប់ពាន់នាក់បានមកតាំងទីលំនៅតាមភូមិលើបង្គោលឈើ។ បន្ទាប់ពីអ្នកត្រួសត្រាយ ជនជាតិខ្មែរវៀតណាម ពីរជំនាន់ទៀ តបានកើតក្នុងប្រទេសកម្ពុជា ដោយរស់នៅដោយគ្មានឯកសារផ្លូវការនៃអត្ថិភាពរបស់ពួកគេរហូតម ក ដល់សព្វថ្ងៃនេះ។យោងតាមសមាគមវៀតណាមក្រៅប្រទេសកម្ពុជា ជនជាតិវៀតណាមជាង ១៥០០ គ្រួសាររស់នៅក្នុងភូមិបណ្តែតទឹកតាមបឹងទន្លេសាប ៕SP
