ភ្នំពេញ ៖ រាជរដ្ឋាភិបាលកម្ពុជា បានប្រកាសបន្តផ្ដល់ជំនួយម៉ាសជាង៣.២លាន និងសម្ភារៈយុទ្ធសាស្ត្រជាច្រើនទៀត ដល់រដ្ឋាភិបាលមីយ៉ាន់ម៉ា នៅក្នុងដំណើរទស្សនកិច្ច របស់សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា ទៅកាន់ប្រទេសសមាជិកអាស៊ានមួយនេះ នៅថ្ងៃទី៧-៨ ខែមករា ឆ្នាំ២០២២។ នេះបើតាមលោកស្រី យក់ សម្បត្តិ រដ្ឋលេខាធិការ ក្រសួងសុខាភិបាល ។

សូមរំលឹកថា នេះជាលើកទី៣ហើយ ដែលរដ្ឋាភិបាលកម្ពុជាបានផ្ដល់ជំនួយដល់ប្រទេសមីយ៉ាន់ម៉ា ក្នុងការប្រយុទ្ធប្រឆាំងនឹងជំងឺកូវីដ១៩ ខណៈដែលប្រទេសនេះ កំពុងមានវិបត្តិនយោបាយ និងជួបភាពវឹកវរ ក្រោយមានរដ្ឋប្រហារទម្លាក់លោកស្រី អោង សានស៊ូជីចេញពីតំណែង កាលពីខែកុម្ភៈ ឆ្នាំ២០២១។

សូមបញ្ជាក់ដែរថា សម្ដេចតេជោ ហ៊ុន សែន នឹងបំពេញទស្សនកិច្ច នៅប្រទេសមីយ៉ាន់ម៉ារយៈពេលពីរថ្ងៃ ចាប់ពីថ្ងៃទី០៧ ខែមករា ស្អែកនេះ ដើម្បីសម្របសម្រួលដោះស្រាយវិបត្តិនៅក្នុងប្រទេសមីយ៉ាន់ម៉ា និងពង្រឹងមជ្ឈភាពរបស់អាស៊ាន៕EB