ភ្នំពេញ ៖ សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានលើកឡើងថា ប្រជាពលរដ្ឋដ៏ច្រើនលើសលុប បានទៅបោះឆ្នោតជ្រើសតាំងតំណាងរាស្រ្ដ នីតិកាលទី៧ កាលពីថ្ងៃទី ២៧ ខែកក្កដា ឆ្នាំ ២០២៣កន្លងទៅនេះ បានបង្ហាញឲ្យឃើញថា «ពួកគាត់ជឿជាក់ថា មានតែការបោះឆ្នោតទេជាមធ្យោបាយល្អ ក្នុងការជ្រើសរើសមេដឹកនាំប្រទេស មិនមែនតាមរយៈធ្វើបាតុកម្ម បង្កចលាចលក្នុងសង្គមនោះទេ»។

ការលើកឡើងនេះ បានធ្វើឡើងក្នុងពិធីសំណេះសំណាល ជាមួយកម្មករ-និយោជិតចំនួន ១២.០៦០នាក់ នៅតាមបណ្តា រោងចក្រ សហគ្រាស ដែលមានមូលដ្ឋានស្ថិតនៅក្នុងស្រុកព្រៃឈរ និងស្រុកកំពង់សៀម ខេត្តកំពង់ចាម នាព្រឹកថ្ងៃទី ២៥ ខែតុលា ឆ្នាំ ២០២៣។

សម្ដេច នាយករដ្ឋមន្ត្រី មានប្រសាសន៍ថា «នៅទូទាំងប្រទេសជាង ៨លាន ២សែននាក់ ៨៤.៥៩ភាគរយ បានអញ្ជើញទៅបោះឆ្នោតបំពេញកាតព្វកិច្ច ជឿទុកចិត្តទៅលើការបោះឆ្នោតថា មានតែការបោះឆ្នោតតាមរដ្ឋធម្មនុញ្ញទេ ដែលជាមធ្យោបាយដែលមានសុវត្ថិភាព ស្ថេរភាព ដើម្បីរើសមេដឹកនាំ មិនមែនតាមការអំពាវនាវដុតប្រទេស បាតុកម្ម ធ្វើរដ្ឋប្រហារ នោះទេ»៕EB