Turkey៖ អ្នកនៅរស់រានមានជីវិតចំនួន ៩ នាក់ ត្រូវបានជួយសង្គ្រោះពីគំនរបាក់បែកក្នុងប្រទេសទួរគី កាលពីថ្ងៃអង្គារ ច្រើនជាងមួយសប្តាហ៍ បន្ទាប់ពីការរញ្ជួយដីដ៏ធំមួយបានវាយប្រហារ ខណៈដែលការយកចិត្តទុកដាក់នៃកិច្ចខិតខំប្រឹងប្រែងជំនួយឥឡូវនេះបានផ្លាស់ប្តូរទិសដៅទៅជាការជួយមនុស្ស ដែលកំពុងជួបការលំបាកដោយសារគ្មានទីជម្រក ឬអាហារគ្រប់គ្រាន់នៅក្នុងអាកាសធាតុត្រជាក់ដ៏ល្វីងជូរចត់វិញ។

គ្រោះមហន្តរាយដែលមានចំនួនអ្នកស្លាប់រួមបញ្ចូលគ្នានៅក្នុងប្រទេសទួរគី និងប្រទេសជិតខាងស៊ីរី មកដល់ពេលនេះកើនលើសពី ៤១.០០០ នាក់ ដោយបានបំផ្លិចបំផ្លាញទីក្រុងនៅក្នុងប្រទេសទាំងពីរ ដោយបន្សល់ទុកអ្នករស់រានមានជីវិតជាច្រើន រស់នៅដោយគ្មានផ្ទះសម្បែងក្នុងសីតុណ្ហភាពរដូវរងាត្រជាក់ជិតកក។

ប្រធានាធិបតីទួរគី លោក Tayyip Erdogan បានទទួលស្គាល់បញ្ហាក្នុងការឆ្លើយតបដំបូងចំពោះគ្រោះរញ្ជួយដីកម្រិត ៧.៨ រ៉ិចទ័រ ដែលបានវាយប្រហារនៅព្រឹកព្រលឹមថ្ងៃទី ៦ ខែកុម្ភៈ ប៉ុន្តែបាននិយាយថា ស្ថានភាពពេលនេះស្ថិតនៅក្រោមការគ្រប់គ្រងហើយ។ ជាក់ស្តែង លោក Tayyip Erdogan បាននិយាយនៅក្នុងសុន្ទរកថាតាមទូរទស្សន៍នៅទីក្រុងអង់ការ៉ាថា "យើងកំពុងប្រឈមមុខនឹងគ្រោះមហន្តរាយធម្មជាតិដ៏ធំបំផុតមួយមិនត្រឹមតែនៅក្នុងប្រទេសរបស់យើងប៉ុណ្ណោះទេ ប៉ុន្តែក៏មាននៅក្នុងប្រវត្តិសាស្រ្តនៃមនុស្សជាតិផងដែរ"។

អ្នកដែលត្រូវបានជួយសង្គ្រោះកាលពីថ្ងៃអង្គារ រួមមាន បងប្អូន ២ នាក់ ដែលមានអាយុ ១៧ ឆ្នាំ និង ២១ ឆ្នាំ ដែលត្រូវបានទាញចេញពីប្លុកផ្ទះល្វែងក្នុងខេត្ត Kahramanmaras និងបុរសជនជាតិស៊ីរីម្នាក់និងស្ត្រីវ័យក្មេងរុំកន្សែងក្បាលខ្លារខិននៅ Antakya ត្រូវបានជួយសង្គ្រោះបន្ទាប់ពីពេលជាង ២០០ ម៉ោង នៅក្នុងគំនរបាក់បែក។ ជាងនេះទៅទៀត អ្នកជួយសង្គ្រោះម្នាក់ក៏បាននិយាយថា អាចនឹងមានមនុស្សនៅរស់បន្តទៀតដែលនឹងត្រូវរកឃើញ។ 

គួររំលឹកថា អាជ្ញាធរអង្គការសហប្រជាជាតិបាននិយាយថា ដំណាក់កាលសង្គ្រោះកំពុងឈានដល់កៀកទីបញ្ចប់ហើយ ដោយនឹងធ្វើការផ្តោតសំខាន់ទៅលើទីជម្រក អាហារ និងសាលារៀន វិញ។ NR