បរទេស៖ ទាហានអ៊ីស្រាអែល បានវាយលុកចូលមន្ទីរពេទ្យ Al Nasser នៅភាគខាងត្បូងតំបន់ហ្គាហ្សា ដែលជាកន្លែងថែទាំសុខភាពដ៏ធំបំផុតដែលនៅតែដំណើរការនៅក្នុងរង្វង់ដែលឡោមព័ទ្ធ, នេះបើយោងតាមការឱ្យដឹងទាំងពីខាងយោធាអ៊ីស្រាអែល និងមន្ត្រីមកពីក្រសួងសុខាភិបាលប៉ាឡេស្ទីនដែលគ្រប់គ្រងដោយក្រុមហាម៉ាស។នេះបើយោងតាមសារព័ត៌មាន RT ចេញផ្សាយនៅថ្ងៃទី១៥ ខែកុម្ភៈ ឆ្នាំ២០២៤។

កងកម្លាំងការពារអ៊ីស្រាអែល (IDF) បាននិយាយនៅក្នុងសេចក្តីថ្លែងការណ៍មួយដែលបានចេញតាមរយៈអ្នកនាំពាក្យរបស់ខ្លួនគឺលោក Daniel Hagari ថា ខ្លួនបានទទួល ព័ត៌មាន “ចារកម្មដ៏គួរឱ្យទុកចិត្ត” ដើម្បីគាំទ្រការអះអាងថា ក្រុមហាម៉ាស់ “បានចាប់ចំណាប់ខ្មាំងនៅមន្ទីរពេទ្យ Khan Yunis” ។កងកម្លាំងការពារអ៊ីស្រាអែល ក៏បានបង្ហាញដែរថា ខ្លួនជឿថាក្រុមសកម្មប្រយុទ្ធហាម៉ាសកំពុងលាក់ខ្លួននៅក្នុងកន្លែងនោះ ទោះបីជាខ្លួនមិនបានបញ្ចេញភស្តុតាងភ្លាមៗដើម្បីគាំទ្រការទាមទារនេះក៏ដោយ។ អ្នកនាំពាក្យក្រុមហាម៉ាស់បានច្រានចោលសេចក្តីថ្លែងការណ៍របស់ IDF និងថា ជាពាក្យកុហក។

ក្រុមជំនួយ Medecins Sans Frontieres បាននិយាយនៅក្នុងសេចក្តីថ្លែងការណ៍មួយថា វាត្រូវបានជូនដំណឹងដោយបុគ្គលិកមន្ទីរពេទ្យអំពី “ស្ថានភាពវឹកវរ” នៅក្នុងមន្ទីរពេទ្យ “ជាមួយនឹងចំនួនមនុស្សស្លាប់ និងរបួសដែលមិនអាចកំណត់បាន” ៕