វៀតណាម ៖ អ្នកនាំពាក្យក្រសួងការបរទេសវៀតណាម លោកស្រី Pham Thu Hang បាននិយាយកាលពីថ្ងៃសុក្រថា "វៀតណាមមានការសោកស្តាយចំពោះការសម្រេចចិត្តរបស់សហរដ្ឋអាមេរិកក្នុងការដំឡើងពន្ធសងសឹកលើការនាំចេញរបស់វៀតណាមទៅកាន់សហរដ្ឋអាមេរិក" ។នេះបើតាមការចេញផ្សាយដោយសារព័ត៌មានVnexpress នៅថ្ងៃទី ៤ ខែមេសា ឆ្នាំ២០២៥។

អ្នកនាំពាក្យក្រសួងការបរទេសវៀតណាម បានបន្ថែមថា "យើងជឿជាក់ថាការសម្រេចចិត្តនេះគឺមិនស៊ីសង្វាក់គ្នានឹងការពិតនៃកិច្ចសហប្រតិបត្តិការសេដ្ឋកិច្ច និងពាណិជ្ជកម្មដែលមានផលប្រយោជន៍ទៅវិញទៅមករវាងប្រទេសទាំងពីរ។ ប្រសិនបើអនុវត្តវានឹងជះឥទ្ធិពលអវិជ្ជមានដល់ទំនាក់ទំនងសេដ្ឋកិច្ច និងពាណិជ្ជកម្មទ្វេភាគី និងប៉ះពាល់ដល់ផលប្រយោជន៍របស់ប្រជាជន និងធុរកិច្ចនៃប្រទេសទាំងពីរ"។

នាពេលថ្មីៗនេះ វៀតណាមបានចូលរួមក្នុងការផ្លាស់ប្តូរ និងពិភាក្សាយ៉ាងសកម្មជាមួយសហរដ្ឋអាមេរិក លើវិធានការជាក់លាក់សំដៅដោះស្រាយឧបសគ្គ ជំរុញកិច្ចសហប្រតិបត្តិការសេដ្ឋកិច្ច និងពាណិជ្ជកម្មទ្វេភាគី និងបន្តស្វែងរកពាណិជ្ជកម្មដោយយុត្តិធម៌ និងនិរន្តរភាព ដែលស្របតាមផលប្រយោជន៍របស់ភាគីទាំងពីរ។

អ្នកនាំពាក្យក្រសួងការបរទេសបាននិយាយថា “វៀតណាមនឹងបន្តធ្វើការជាមួយសហរដ្ឋអាមេរិកក្នុងស្មារតីស្ថាបនា និងសហប្រតិបត្តិការ ដើម្បីស្វែងរកដំណោះស្រាយជាក់ស្តែង រួមចំណែកដល់ការអភិវឌ្ឍន៍ស្ថិរភាព និងនិរន្តរភាពនៃទំនាក់ទំនងសេដ្ឋកិច្ចទ្វេភាគី និងបំពេញផលប្រយោជន៍ប្រជាជន និងធុរកិច្ចនៃប្រទេសទាំងពីរ”។

ប្រធានាធិបតីអាមេរិកលោក Donald Trump បានប្រកាសអត្រាពន្ធនាំចូលសម្រាប់ដៃគូពាណិជ្ជកម្មជាង 180 កាលពីថ្ងៃព្រហស្បតិ៍កន្លងទៅ ។ដៃគូពាណិជ្ជកម្មសំខាន់ៗរបស់សហរដ្ឋអាមេរិកនឹងប្រឈមមុខនឹងអត្រាខ្ពស់រហូតដល់ 50% ចាប់ពីថ្ងៃទី ៩ ខែមេសា។

ជាមួយគ្នានេះ វៀតណាមត្រូវជាប់ពន្ធ ៤៦% ដោយដាក់វាក្នុងចំណោមប្រទេសដែលប្រឈមនឹងពន្ធខ្ពស់បំផុតរួមជាមួយប្រទេសចិន កម្ពុជា ឥណ្ឌូនេស៊ី និងមីយ៉ាន់ម៉ា។នាយករដ្ឋមន្ត្រី Pham Minh Chinh បានដឹកនាំកិច្ចប្រជុំជាមួយក្រសួង ស្ថាប័ននានានៅព្រឹកថ្ងៃព្រហស្បតិ៍ ដើម្បីដោះស្រាយបញ្ហានេះ៕