ទីស្ដីការក្រសួងមហាផ្ទៃ ៖ នារសៀលថ្ងៃទី៤ ខែមេសា ឆ្នាំ២០២៥នេះ ឯកឧត្តម នាយឧត្តមសេនីយ៍ ប៉ោ ភក្តិ រដ្ឋលេខាធិការ ក្រសួងមហាផ្ទៃ និងជាតំណាងដ៏ខ្ពង់ខ្ពស់ ឯកឧត្តមអភិសន្ដិបណ្ឌិត ស សុខា ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ បានអញ្ជើញជាអធិបតីសិក្ខាសាលា ស្ដីពី «បរិវត្តកម្មប្រព័ន្ធបច្ចេកវិទ្យាឌីជីថល ក្រសួងមហាផ្ទៃ»។

ពិធីបិទសិក្ខាសាលានេះដែរ ក៏មានអញ្ជើញចូលរួមពី ឯកឧត្តម អនុរដ្ឋលេខាធិការក្រសួងមហាផ្ទៃ, ឯកឧត្តម ឧត្តមសេនីយ៍ឯក ហោ សំអាត អគ្គនាយក នៃអគ្គនាយកដ្ឋានបច្ចេកវិទ្យាឌីជីថលនិងផ្សព្វផ្សាយអប់រំ, អគ្គនាយករង ប្រធាននាយកដ្ឋាន ប្រធានស្ថាននីយ៍វិទ្យុ និងទូរទស្សន៍មហាផ្ទៃ អនុប្រធាននាយកដ្ឋាន លោកនាយការិយាល័យ ព្រមទាំងលោក លោកស្រី ជាតំណាង ទីប្រឹក្សា នាយកប្រតិបត្តិក្រុមហ៊ុន AIT នាយកប្រតិបត្តិក្រុមហ៊ុន N2M តំណាងក្រុមហ៊ុនឯកជន និងមន្ត្រីជំនាញដែលពាក់ព័ន្ធតាមបណ្តាអង្គភាព ស្ថាប័ន ចំណុះក្រសួងមហាផ្ទៃជាច្រើនរូបទៀត។

ក្រោយបញ្ចប់ការធ្វើរបាយការណ៍សង្ខេបអំពីលទ្ធផលសិក្ខាសាលា ដោយ លោកឧត្តមសេនីយ៍ទោ គឹម សិរីវុឌ្ឍ អគ្គនាយករង នៃអគ្គនាយកដ្ឋានបច្ចេកវិទ្យាឌីជីថល និងផ្សព្វផ្សាយអប់រំ រួចមក ឯកឧត្តម នាយឧត្តមសេនីយ៍ ប៉ោ ភក្តិ រដ្ឋលេខាធិការ ក្រសួងមហាផ្ទៃ បានមានប្រសាសន៍ថា ក្នុងនាម ឯកឧត្តមអភិសន្តិបណ្ឌិត ស សុខា និងក្នុងនាម ឯកឧត្តម ផ្ទាល់ បានសម្តែងនូវការកោតសរសើរ និងវាយតម្លៃខ្ពស់ចំពោះការរៀបចំអង្គសិក្ខាសាលា រយៈពេល ១ថ្ងៃពេញ ស្របតាមរបៀបវារៈដែលបានគ្រោងទុក និងចាត់ទុកថា «នេះគឺជាការ ចែករំលែកបទពិសោធន៍ និងចំណេះដឹងថ្មីៗ លើវិស័យបច្ចេកវិទ្យាឌីជីថល»។

ឯកឧត្តម រដ្ឋលេខាធិការ ក៏បានថ្លែងអំណរគុណ ចំពោះអគ្គនាយកដ្ឋានបច្ចេកវិទ្យាឌីជីថល និងផ្សព្វផ្សាយអប់រំ ក្រុមហ៊ុន NTOM របស់ប្រទេសកូរ៉េ អង្គការជាតិ អន្តរជាតិ និងអគ្គនាយកដ្ឋានពាក់ព័ន្ធ ក្រោមចំណុះក្រសួងមហាផ្ទៃ និងសមាជិក-សមាជិកា ទាំងអស់ ដែលបានចូលរួមសហការគាំទ្រលើផ្នែកបច្ចេកទេស និងសម្ភារពាក់ព័ន្ធផ្សេងៗ ដែលបានញ៉ាំងឱ្យអង្គសិក្ខាសាលានេះប្រព្រឹត្តទៅប្រកបដោយគុណភាព និងបានផ្តល់គុណតម្លៃខ្ពស់ ដល់សមាជិក-សមាជិកា ទទួលបាននូវចំណេះដឹងថ្មីៗបន្ថែមទៀតពាក់ព័ន្ធនឹងបច្ចេកវិទ្យាឌីជីថល ដើម្បីយកទៅប្រើប្រាស់ជាប្រយោជន៍សម្រាប់អង្គភាព សំដៅធានាឱ្យបាននូវគោលដៅរួមនៃការ ការពារសុខសុវត្ថិភាព និងសណ្តាប់ធ្នាប់សាធារណៈជូនសង្គមជាតិ។

ឯកឧត្តម រដ្ឋលេខាធិការ ក៏មានក្ដីសង្ឃឹមយ៉ាងមុតមាំថា ឯកឧត្តម លោកជំទាវ លោក លោកស្រី ដែលអញ្ជើញមកពីបណ្ដាអគ្គនាយកដ្ឋាន អង្គភាព ចំណុះក្រសួងមហាផ្ទៃ នឹងទទួលបានចំណេះដឹងថ្មីៗបន្ថែមពាក់ព័ន្ធជំនាញឌីជីថល ដើម្បីកើតជាប្រយោជន៍រួមសម្រាប់អង្គភាព។

សូមជម្រាបជូនថា សិក្ខាសាលា ស្ដីពី «បរិវត្តកម្មប្រព័ន្ធបច្ចេកវិទ្យាឌីជីថល ក្រសួងមហាផ្ទៃ» បានប្រព្រឹត្តិទៅរយៈពេល ១ថ្ងៃពេញ ដោយពិធីបើកសិក្ខសាលា បានធ្វើឡើងក្រោមអធិបតីភាព ឯកឧត្តម ឧត្តមសេនីយ៍ឯក ហោ សំអាត អគ្គនាយក នៃអគ្គនាយកដ្ឋានបច្ចេកវិទ្យាឌីជីថលនិងផ្សព្វផ្សាយអប់រំ ក្រសួងមហាផ្ទៃ៕