ឥណ្ឌូនេស៊ី ៖ ឥណ្ឌូណេស៊ីគ្រោង ការដាក់ពន្ធប្រឆាំងការលក់បង្ខូចថ្លៃ លើការនាំចូលប្លាស្ទិកនីឡុងពីចិន ថៃ និងតៃវ៉ាន់ ដើម្បីជំរុញការប្រើប្រាស់ផលិតកម្មក្នុងស្រុក។បទប្បញ្ញត្តិនេះ នឹងចូលជាធរមានក្នុងខែនេះ និងមានសុពល៤ឆ្នាំបន្ទាប់។

ជាមួយគ្នា ក្រសួងចុះបញ្ជីក្រុមហ៊ុនមកពីប្រទេសចិន ថៃ និងតៃវ៉ាន់ នឹងត្រូវបង់ពន្ធនាំចូល ដែលមានតម្លៃចាប់ពី១២៥៤ រូពៀ ឬស្មើនឹង០,០៧៦ដុល្លារ ដល់៣១៥១០រូពៀ ឬស្មើនឹង១,៩២ដុល្លារក្នុងមួយគីឡូក្រាម។ ក្រុមហ៊ុនទាំងនោះរួមមាន៖ Kunshan Yuncheng Plastic Industry and Yuncheng Heshan New Material របស់ប្រទេសចិន និងAJ Plast របស់ប្រទេសថៃ និងក្រុមហ៊ុនផ្សេងៗទៀតនៅក្នុងប្រទេសទាំងពីរ។

លើសពីនេះ ក្រសួងហិរញ្ញវត្ថុអះអាងថា ការយកពន្ធនឹងអនុវត្តចំពោះក្រុមហ៊ុនទាំងអស់នៅក្នុងតៃវ៉ាន់ ខណៈចំណាត់ការនេះកើតឡើងបន្ទាប់ពីការស៊ើបអង្កេតរបស់ឥណ្ឌូណេស៊ីបានរកឃើញថា ផលិតផលនាំចូលមកពីបណ្តាក្រុមហ៊ុនទាំងនោះ បណ្តាលឱ្យមានការខាតបង់យ៉ាងធ្ងន់ធ្ងរនៅក្នុងឧស្សាហកម្មក្នុងស្រុក។ យ៉ាងណា ចិន គឺជាដៃគូពាណិជ្ជកម្មដ៏ធំបំផុតរបស់ឥណ្ឌូណេស៊ី។ គួរបញ្ជាក់ថា ប្លាស្ទីកនីឡុងត្រូវបានប្រើប្រាស់យ៉ាងទូលំទូលលាយក្នុងការវេចខ្ចប់ម្ហូបអាហារ និងឧស្សាហកម្ម ឱសថ អេឡិចត្រូនិក និងវាយនភណ្ឌ៕