ភ្នំពេញ ៖ លោកឧបនាយករដ្ឋមន្ត្រី ស សុខា រដ្ឋមន្ត្រីក្រសួងមហាផ្ទៃ បានលើកឡើងអំពីតួនាទី និងភារកិច្ចរបស់មន្ត្រីកងកម្លាំង នៅពេលដែលគ្រងឯកសណ្ឋានហើយ គឺមិនមែនជាម្ចាស់របស់ប្រជាពលរដ្ឋនោះទេ ហើយក៏មិនមែនជាអ្នកបញ្ជា ពោលគឺជាអ្នកបំរើប្រជាពលរដ្ឋ ថែរក្សាសេចក្តីសុខ ប្រកបដោយការទទួលខុសត្រូវ រហូតចប់ម៉ោងធ្វើការ។ 

ការថ្លែងបែបនេះក្នុងឱកាស លោកឧបនាយករដ្ឋមន្ត្រី អញ្ជើញជាអធិបតីពិធីសម្ពោធដាក់ឱ្យប្រើប្រាស់ជាផ្លូវការនូវអគារ ១ខ្នង កម្ពស់២ជាន់ ទំហំ ២៤ម៉ែត្រx១០ម៉ែត្រ ស្មើ ១៤បន្ទប់ សមិទ្ធផលនានា និងសំណេះសំណាលជាមួយកងកម្លាំងនគរបាលជាតិ នៃស្នងការដ្ឋាននគរបាលខេត្តកំពង់ចាម នៅស្នងការដ្ឋានខេត្តកំពង់ចាម។

ស្របនឹងឱកាសបុណ្យចូលឆ្នាំថ្មីប្រពៃណីជាតិខ្មែរ ជិតឈានចូលមកដល់ប្រមុខក្រសួងមហាផ្ទៃ ក៏បានណែនាំដល់ថ្នាក់ដឹកនាំខេត្តទាំងអស់មិនអាចសម្រាកបានទេ ត្រូវចូលថែរក្សាការពារប្រជាពលរដ្ឋរាប់លាននាក់ ដែលឆ្លងកាត់ខេត្តរបស់ខ្លួន។ លោក បានបន្តទៀតថា ជាក់ស្តែងគិតត្រឹមម៉ោងនេះ នៅច្រកព្រំដែនអន្តរជាតិកម្ពុជា-ថៃ ពលរដ្ឋមួយចំនួនកំពុងធ្វើដំណើរវិលត្រឡប់ ដើម្បីអបអរពិធីបុណ្យជាតិដ៏ធំ ដែលជាប្រពៃណីទំនៀមទម្លាប់ខ្មែរ និងទាមទាឱ្យថ្នាក់ដឹកនាំទាំងអស់ចូលរួមបំរើសេវាមួយនេះឱ្យបានរលូន។ 

ក្នុងនាមរាជរដ្ឋាភិបាល  និងក្នុងនាមក្រសួងមហាផ្ទៃ លោក បានថ្លែងអំណរគុណ គណៈបញ្ជាការឯកភាពខេត្ត មន្ត្រីនគរបាល កងរាជអាវុធហត្ថខេត្ត ក្នុងការលះបង់អស់កម្លាំងកាយចិត្ត ក្នុងការថែរក្សាសុវត្ថិភាពជូនប្រជាពលរដ្ឋ និងការពារនូវសមិទ្ធផលដែលសម្រេចបានគ្រប់កាលៈទេសៈ ក្រោមការចង្អុលបង្ហាញរបស់រាជរដ្ឋាភិបាល។ 

ដើម្បីជាការតបស្នងចំពោះការខិតខំប្រឹងប្រែងប្រមុខក្រសួងមហាផ្ទៃ ក៏បានគូសបញ្ជាក់ថា រាជរដ្ឋាភិបាលបានជំរុញ និងអនុវត្តវិធានការគន្លឹះជាច្រើនអាទិភាព ព្រមទាំងដាក់ចេញនូវយុទ្ធសាស្ត្របញ្ចកោណដំណាក់កាលទី១ ក្នុងន័យជំរុញការអភិវឌ្ឍសេដ្ឋកិច្ចសង្គម ដើម្បីឈានទៅសម្រេចឱ្យបាននូវចក្ខុវិស័យ កម្ពុជាឆ្នាំ២០៥០ ឱ្យក្លាយទៅជាប្រទេសកំពុងអភិវឌ្ឍ៕