បាងកក៖ មហាសេដ្ឋីថាក់ស៊ីនវ័យ ៧៤ឆ្នាំ និងជាអតីត​នាយក​រដ្ឋមន្ត្រី​ថៃ លោក ថាក់ស៊ីន ស៊ីណាវ៉ាត្រា បានសម្រាកព្យាបាលនៅមន្ទីរពេទ្យដោយជំងឺលើសឈាម និងថប់ទ្រូងក្នុងរយៈពេលត្រឹមតែ​ប៉ុន្មាន​ម៉ោងនៃ​​ការវិលត្រឡប់ចូលប្រទេសថៃវិញនៅថ្ងៃទី ២២ ខែសីហាឆ្នាំ ២០២៣ បន្ទាប់ពីការ​និរទេ​សខ្លួ​ននៅក្រៅប្រទេសរយៈពេលជាង១៥ឆ្នាំ។

ដំបូងឡើយ លោកត្រូវបានកាត់ទោសឱ្យជាប់ពន្ធនាគាររយៈពេល ៨ឆ្នាំ ពីបទរំលោភអំណាច។ ព្រះ​មហាក្សត្រថៃ មហា វិជ្ជរ៉ាឡុងកន បានសម្រាលទោសរបស់អតីតនាយករដ្ឋមន្ត្រីថាក់ស៊ីន ស៊ីណាវ៉ាត្រា ពីត្រូវជាប់ពន្ធនាគាររយៈពេលប្រាំបីឆ្នាំមកត្រឹមមួយឆ្នាំវិញ។ ព្រះរាជក្រឹត្យ​បានរៀបរាប់ថា៖«លោក ថាក់​ស៊ីន ព្រមទទួលកំហុសរបស់គាត់ ហើយបានបង្ហាញពីវិប្បដិសារីដែលបានធ្វើដូច្នោះ»។ ព្រះរាជក្រឹត្យ បន្ថែមថា អតីតនាយករដ្ឋមន្ត្រីរូបនេះក៏កំពុងមានជំងឺប្រចាំកាយផងដែរ។ 

ទន្ទឹមគ្នានេះ មន្រ្តីនាយកដ្ឋានអប់រំនិងកែប្រែ បានអនុញ្ញាតឱ្យអតីត​នាយក​រដ្ឋមន្ត្រី​រូបនេះបន្តការស្នា​ក់នៅក្នុងមន្ទីរពេទ្យប៉ូលិសដោយលើកឡើងពីតម្រូវការតាមដានសុខភាពរបស់លោក។ តំណាង​អ្នក​ទទួល​បន្ទុក​បាន​ទៅ​ពិនិត្យ​នៅ​មន្ទីរពេទ្យ​អគ្គស្នងការ​ប៉ូលិស​រួច​ហើយ ហើយ​បាន​ជួប​លោក ថាក់ស៊ី​នកំពុងស្ថិត​ក្នុង​មន្ទីរពេទ្យពិតមែន។ ទីប្រឹក្សារដ្ឋមន្ត្រីក្រសួងយុត្តិធម៌រូបនេះសង្កត់ធ្ងន់ថា លោកក៏ជឿថា លោក ថាក់ស៊ីន នៅតែស្ថិតក្នុងមន្ទីរពេទ្យ។ លោកមិនបានចេញមកស្នាក់នៅក្នុងផ្ទះរបស់លោក ដូ​ចដែល​មនុស្សមួយចំនួនដាក់ការសង្ស័យនោះទេ។

គួរបញ្ជាក់ថា លោក ថាក់ស៊ីន ត្រូវបានរបបយោធាចោទប្រកាន់ពីបទពុករលួយ បក្សពួកនិយម និ​ងរំលោភអំណាច ហើយបានធ្វើរដ្ឋប្រហារទម្លាក់លោកចេញពីអំណាចតែម្ដង។ ក្នុងខែសីហាឆ្នាំ ២០​២៣ លោក ថាក់ស៊ីន បានវិលចូលប្រទេសវិញ៕