ខេត្តបាត់ដំបង ៖ អាជ្ញាធរកងរាជអាវុធហត្ថខេត្ដបាត់ដំបង បានចុះប្រតិបិត្តការបង្ក្រាប និងឃាត់ខ្លួនជនសង្ស័យចំនួន២នាក់ ដកហូតបានគ្រឿងញៀនប្រមាណ១០៣៣៤,៦០ក្រាម នៅចំណុចស្ពានត្រស់ ស្ថិតក្នុងភូមិវាលទ្រា ឃុំអូរតាគី ស្រុកថ្មគោល ខេត្តបាត់ដំបង។

រភពព័ត៌មានពីសមត្ថកិច្ចបានឱ្យដឹងនៅរៀលថ្ងៃទី២៦ ខែតុលា ម្សិលមិញថា ប្រតិបត្តិការឃាត់ខ្លួនជនសង្ស័យទាំងពីរនាក់ធ្វើឡើងកាលពីថ្ងៃទី២៥តុលា ក្រោយអាជ្ញាធរកំណត់មុខសញ្ញា និងបានស្ទាក់ចាប់ ជនសង្ស័យ និងវត្ថុតាងនៅនឹងកន្លែង ដែលរួមមាន៖ ទី១.ឈ្មោះ ប៊ូ សុផាត ហៅហ៊ុល ភេទប្រុស អាយុ៦៣ឆ្នាំ នៅភូមិអូរតាគាំមួយ សង្កាត់ទួលតាឯក ក្រុងបាត់ដំបង, ទី២. ឈ្មោះ លី ធារិទ្ឋ ភេទប្រុស អាយុ៤២ឆ្នាំ នៅភូមិកងវ៉ា សង្កាត់កំពង់ស្វាយ ក្រុងសិរីសោភ័ណ្ឌ ខេត្តបន្ទាយមានជ័យ។ 

ចំពោះវត្ថុតាងដែលដកហូតបានមានដូចជា៖ គ្រឿងញៀនប្រភេទ(ម៉ាទឹកកក ICE) ចំនួន២៥កញ្ចប់ទម្ងន់១០៣៣៤,៦០ក្រាម, រថយន្ត១គ្រឿង និងទូរសព្ទដៃ២គ្រឿង។ ក្រោយឃាត់ខ្លួនជនសង្ស័យ រួមនិងវត្ថុតាងរួច កម្លាំងមន្ទីរជំនាញបានកសាងសំណុំរឿង ដើម្បីចាត់ការបន្តតាមនីតិវិធីច្បាប់៕