អាមេរិក៖ ហេតុការណ៍បាញ់ប្រហារ ក្នុងទីក្រុងLouisville ស្ថិតនៅក្នុងរដ្ឋKentucky សហរដ្ឋអាម៉េរិក កាលពីថ្ងៃចន្ទដើមសប្តាហ៍នេះ បានបណ្តា​លឱ្យមនុស្សចំនួន ៤នាក់បានស្លាប់ និង៩នាក់រងរបួសធ្ងន់ធ្ងរ ជាបុគ្គលិកធនាគារ បានប្រើប្រាស់កំាភ្លើងវែងស័្វ​យប្រវត្តិមួយដើមក្នុងការបា​ញ់សម្លាប់អ្នករួមកា​រងារ​ដទៃទៀត ។

បុរសជាខ្មាន់កាំភ្លើងមានឈ្មោះ Connor Sturgeon អាយុ២៣ឆ្នាំ ហើយជនដៃដល់ខា​ងលើបា​នប្រ​ព្រឹត្តសកម្មភាពនេះដោយធ្វើការផ្សាយផ្ទាល់ (Live) តាមរយៈគណនីផ្ទា​ល់ខ្លួន​នៅលើបណ្តា​ញអ៊ី​នធឺណិត មុននឹងឃាតករបានស្លាប់ដោយសារតែគ្រាប់កាំភ្លើងដែលគេ​នៅមិនទាន់ដឹងច្បាស់​ថាជាគ្រាប់កាំភ្លើងរបស់មន្ត្រីអាជ្ញាធរ រឺក៏ជាការធើ្វអត្តឃាតលើខ្លួនឯងនៅឡើយទេ។

មន្ត្រីប៉ូលីសបានដាក់ការសន្និដ្ឋានជាបឋមថា អាចបណ្តាលមកពីគំនុំគុំកួនដោយ​សារតែជនរង​គ្រោះ​ម្នាក់​ក្នុងចំណោមអ្នកស្លាប់ទាំង៤នាក់ គឺជាអនុប្រធានបំរើការនៅសាខាធនាគារជាមួយគ្នានេះ។​ដោយឡែក អ្នករងរបួសធ្ងន់ទាំង៩នាក់ ត្រូវបានបញ្ជូនទៅព្យាបាលនៅឯមន្ទីរពេទ្យក្នុងតំបន់ នៅក្នុ​ងនោះអ្នករបួស២នាក់ គឺជាកងកម្លាំងនគរបាល ដោយម្នាក់ក្នុងចំណោមនោះ រងរបួសនៅត្រង់ក្បាល និងកំពុងស្ថិតនៅក្នុងសភាពធ្ងន់ធ្ងរខ្លាំង ក្រោយការវះកាត់ត្រង់ចំណុចលលាដ៍ក្បាល នេះបើយោងតាមការបញ្ជាក់ពីក្រុមមន្ត្រីអាជ្ញាធរ។

ដោយឡែកសម្រាប់ម្តាយរបស់ខ្មាន់កាំភ្លើង បានអះអាងថា កូនគាត់មិនធ្លាប់មានប្រវ​ត្តិប្រព្រឹត្ត​​អំពើខុសច្បាប់ណាមួយពីមុនមកនោះទេ ហើយជាធម្មតាគេចូលចិត្តលេងកីឡា និងជានិស្សិត​​ផ្នែកពាណិជ្ជកម្មទើបបញ្ចប់ការសិក្សាទៀតផង។ អ្នកស្រីបានបន្តថា កូនប្រុសរបស់គា​ត់បានចូល​ធ្វើជាបុគ្គលិកហាត់ការនៅឯសាខាធនាគារខាងលើនេះ អស់រយៈពេលប្រមាណជា៣ឆ្នាំ មុននឹងក្លា​យជាបុគ្គលិកពេញសិទ្ធិកាលពីចុងឆ្នាំ ២០២២ ៕