អាមេរិក ៖ មន្រ្តីជាន់ខ្ពស់ម្នាក់នៅក្នុងទីក្រុងកៀវ បានប្រាប់សារព័ត៌មាន BBC ថាអ៊ុយក្រែនបានយល់ព្រមជាគោលការណ៍ នៅក្នុងកិច្ចព្រមព្រៀងរ៉ែដ៏ធំមួយ ជាមួយសហរដ្ឋអាមេរិក។ នេះបើយោងតាមការចេញផ្សាយនៅថ្ងៃពុធ ទី២៦ ខែកុម្ភៈ ឆ្នាំ ២០២៥។

ដោយមិនផ្តល់ព័ត៌មានលម្អិត មន្រ្តីរូបនោះនិយាយថា «យើងពិតជាបានយល់ព្រមលើលក្ខខណ្ឌល្អៗមួយចំនួន ហើយមើលឃើញថាវាជារឿងវិជ្ជមាន»។

 បើតាមសេចក្តីរាយការណ៍ពីប្រព័ន្ធផ្សព្វផ្សាយ ទីក្រុងវ៉ាស៉ីនតោន បានទម្លាក់ចោលការទាមទារពីដំបូង សម្រាប់សិទ្ធិចំនួន 50/50 នៅក្នុងប្រាក់ចំណូលពីធនធានធម្មជាតិរបស់អ៊ុយក្រែន ប៉ុន្តែមិនបានផ្តល់ការធានាសន្តិសុខយ៉ាងម៉ឺងម៉ាត់ដល់អ៊ុយក្រែននៅឡើយទេ។

តាមប្រភពដែលដឹងពីខ្លឹមសារនៃសេចក្តីព្រាងកិច្ចព្រមព្រៀងនេះ មិនមានការធានាផ្នែកសន្តិសុខណាមួយ ឬការបន្តផ្តល់អាវុធឡើយ ដោយសហរដ្ឋអាមេរិកគ្រាន់តែលើកឡើងថា ចង់ឱ្យអ៊ុយក្រែន មានសេរីភាព អធិបតេយ្យភាព និងសន្តិសុខ។ ប្រភពមួយទៀតនិយាយថា ការបន្តផ្តល់អាវុធនាពេលអនាគត ស្ថិតក្នុងការពិភាក្សារវាងក្រុងវ៉ាស៉ីនតោន និងទីក្រុងកៀវនៅឡើយ។

គួរបញ្ជាក់ថា នៅក្រោមលក្ខខណ្ឌនៃកិច្ចព្រមព្រៀងរ៉ែ ដែលលោក ហ្សេលេនស្គី បានបដិសេធកន្លងមក សហរដ្ឋអាមេរិក និងអ៊ុយក្រែន នឹងបង្កើតមូលនិធិវិនិយោគកសាងឡើងវិញមួយ ដោយប្រមូលថវិកាពីប្រភពចំណូលរបស់អ៊ុយក្រែន រួមទាំងសារធាតុរ៉ែ អ៉ីដ្រូកាបូន និងវត្ថុធាតុដើមដែលអាចទាញយកបានផ្សេងទៀត។ តមក អ៊ុយក្រែន នឹងផ្តល់ចំណែក ៥០ភាគរយនៃចំណូលរបស់ខ្លួនទៅឱ្យសហរដ្ឋអាមេរិក រហូតដល់គ្រប់ចំនួន ៥០០ពាន់លានដុល្លារ។ ចំណែក សហរដ្ឋអាមេរិក នឹងផ្តល់ការគាំទ្រហិរញ្ញវត្ថុរយៈពេលវែង សម្រាប់ការអភិវឌ្ឍអ៊ុយក្រែន៕