កូរ៉េខាងជើង ៖ មេដឹកនាំកូរ៉េខាងជើង លោក គីម ជុងអ៊ុន បាននិយាយថាប្រទេសរបស់លោក នឹងបង្កើនល្បឿនការបោះជំហានឆ្ពោះទៅរកការក្លាយជាកំពូលមហាអំណាចយោធា ប្រដាប់ដោយអាវុធនុយក្លេអ៊ែរ ហើយថានឹងមិនច្រានចោលឡើយនូវលទ្ធភាពប្រើប្រាស់អាវុធនុយក្លេអ៊ែរ ក្នុងករណីរងការវាយប្រហារណាមួយពីសត្រូវ។ នេះបើតាមប្រព័ន្ធផ្សព្វផ្សាយ រដ្ឋកូរ៉េខាងជើង KCNA ដកស្រង់ចេញផ្សាយដោយទីភ្នាក់ងារសារព័ត៌មាន Reuters។

ប្រព័ន្ធផ្សព្វផ្សាយរដ្ឋកូរ៉េខាងជើង KCNA នៅថ្ងៃអង្គារ ទី៨ ខែតុលានេះក៏បានឱ្យដឹងដែរថាលោក គីម ជុងអ៊ុន បានហៅឈ្មោះប្រធានាធិបតីកូរ៉េខាងត្បូង លោក យូន ស៊ុកយុល ចំៗ ឈ្មោះជាលើកទី២ក្នុងរយៈពេលមួយសប្ដាហ៍ ដោយថ្កោលទោសនូវអ្វីដែលលោកហៅថាជាការគប់គិតជាមួយសហរដ្ឋអាមេរិក ដើម្បីបង្កអស្ថិរភាពនៅក្នុងតំបន់។

លោក គីម ជុងអ៊ុន ថែមទាំងបញ្ជាក់ទៀតផងថាកូរ៉េខាងជើង នឹងបង្កើនល្បឿនការបោះជំហានឆ្ពោះទៅរកការក្លាយជាកំពូលមហាអំណាចយោធាប្រដាប់ដោយអាវុធនុយក្លេអ៊ែរ។ ក្នុងនោះ បើតាម KCNA ការកត់សម្គាល់ខាងលើរបស់លោក គីម ជុងអ៊ុន ត្រូវបានធ្វើឡើងកាលពីថ្ងៃចន្ទម្សិលមិញ ជាថ្ងៃតែមួយដែលកូរ៉េខាងជើងឱ្យដឹងថាសភារបស់ខ្លួន នឹងកោះប្រជុំដើម្បីពិភាក្សាពីការធ្វើវិសោធនកម្មរដ្ឋធម្មនុញ្ញ៕