ក្រុងម៉ានីល៖ អតីតប្រធានាធិបតីហ្វីលីពីន លោក Rodrigo Duterte លើកឡើងថា លោកបានត្រៀមរួចជាស្រេច ប្រសិនបើតុលាការព្រហ្មទណ្ឌអន្តរជាតិ ICC ចេញដីកាចាប់ខ្លួនលោក ជុំវិញសង្រ្គាមបង្រ្កាបគ្រឿងញៀនរបស់លោក ដែលបានសម្លាប់មនុស្សរាប់ពាន់នាក់។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នាថ្ងៃចន្ទ ទី១០ ខែមីនា ឆ្នាំ២០២៥។

ការលើកឡើងបែបនេះក្នុងពេលដែលលោក ជួបជុំជាមួយពលករហ្វីលីពីនរាប់ពាន់នាក់ នៅហុងកុង ដោយសង្ឃឹមថា នឹងអាចបង្កើនការគាំទ្រ សម្រាប់បេក្ខភាពសមាជិកព្រឹទ្ធសភារបស់លោក នៅក្នុងការបោះឆ្នោតពាក់កណ្តាលឆ្នាំ ដែលនឹងមកដល់​នៅប្រទេសហ្វីលីពីន។

លោកថាការបង្រ្កាបគ្រឿងញៀនដែលលោកបានធ្វើកន្លងទៅ គឺមិនមែនដើម្បី ខ្លួនលោក  គ្រួសារលោក នោះទេគឺសម្រាប់អ្នកទាំងអស់គ្នា និងក្មេងៗជំនាន់ក្រោយ ហើយសម្រាប់ប្រទេសជាតិយើង។ ប្រ​សិនបើដីកាចាប់ខ្លួនជាការពិត ខ្ញុំនឹងទទួលយកវា។ ពួកគេអាចចាប់ខ្ញុំ អាចដាក់គុកខ្ខ្ញុំបានធ្វើអ្វីគ្រប់យ៉ាងអំឡុ​ង​ពេលកាន់អំណាច គឺដើម្បីតែសន្តិភាពនិងជីវិតរស់នៅដោយសុខសាន្ត សម្រាប់ប្រជាជនហ្វីលីពីន»។

គួរបញ្ជាក់ថា យោងតាមទិន្នន័យផ្លូវការចុងក្រោយដែលចេញផ្សាយដោយប្រទេសហ្វីលីពីន យ៉ាងហោចណាស់មនុស្សជាង ៦១៨១ នាក់ត្រូវបានសម្លាប់នៅក្នុងប្រតិបត្តិការប្រឆាំងគ្រឿងញៀនជាង ២០០ ០០០ ករណីដែលធ្វើឡើងចាប់តាំងពីខែកក្កដា ឆ្នាំ ២០១៦៕