ជប៉ុន ៖ ប្រធានរដ្ឋសភាជប៉ុន បានឱ្យដឹងថា នៅថ្ងៃពុធនេះ នាយករដ្ឋមន្រ្តីជប៉ុនថ្មី គឺលោក Shigeru Ishiba បានរំលាយសភា ដើម្បីបើកផ្លូវរៀបចំការបោះឆ្នោតសកលមុនអាណត្តិ នាថ្ងៃទី២៧ ខែតុលា។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នាថ្ងៃពុធ ទី៩ ខែតុលា ឆ្នាំ២០២៤។

លោក Ishiba វ័យ៦៧ឆ្នាំ បានឡើងកាន់តំណែងជា នាយករដ្ឋមន្រ្តីថ្មីនៃប្រទេសជប៉ុន កាល​ពីដើមខែតុលានេះ ។ លោក Kishida បានសម្រេចចិត្តប្រកាសពីបំណងលាលែងពីតំណែង កាលពីខែសីហា ដោយសារតែ ការធ្លាក់ចុះប្រជាប្រិយភាព ក្រោយដឹកនាំប្រទេស ​បានរយៈពេ​លប្រមាណជា៣ឆ្នាំ។

គួរបញ្ជាក់ថា ចាប់តាំងពីបង្កើតឡើងនៅឆ្នាំ១៩៥៥ គណបក្ស LDP បានកាន់អំណាចនៅប្រទេសជប៉ុន សឹងជាប់មករហូត លើកលែងតែកាលពីចន្លោះឆ្នាំ១៩៩៣-១៩៩៤ និង២០០៩-២០១២។ គណបក្សនេះ ត្រូវបានរំពឹងថា នឹងបន្តទទួលជ័យជម្នះ ក្នុងការបោះឆ្នោតសកល ២៧ តុលា ប៉ុន្តែលោក Ishiba ចង់បង្កើនចំនួនអាសនៈនៅក្នុងរដ្ឋសភា និងពង្រឹងអាណត្តិរបស់លោកឱ្យរឹងមាំ៕