មន្ត្រីយោធាមួយរូបមានវិប្បត្តិផ្លូវចិត្តបើករថយន្តពីខេត្តព្រះសីហនុ ទៅបាញ់សម្លាប់ខ្លួនឯងនៅខេត្តតាកែវ
តាកែវ៖ មន្ត្រីយោធាមួយរូបបម្រើការងារនៅសឹករងខេត្តព្រះសីហនុ ចំណុះយោធភូមិភាគទី៣ មិនដឹងថាមានវិប្បត្តិផ្លូវចិត្តរឿងអ្វី បើករថយន្តផ្ទាល់ខ្លួនពីខេត្តព្រះសីហនុ ចូលទៅធ្វើអត្តឃាតដោយបាញ់សម្លាប់ខ្លួនឯងនៅក្នុងរោងចំការរបស់ឪពុកម្តាយ បង្កឲ្យភ្ញាក់ផ្អើលកាលពីវេលាម៉ោង៦ល្ងាចថ្ងៃទី០៤ ខែឧសភា ឆ្នាំ២០២៣ នៅភូមិត្រពាំងឫស្សី សង្កាត់បារាយណ៍ ក្រុងដូនកែវ ខេត្តតាកែវ ។
ជនរងគ្រោះឈ្មោះ ហ៊ន ប៊ុនណ្ណារ័ត្នភេទប្រុស អាយុ៤៣ឆ្នាំ ជាមន្ត្រីយោធាបម្រើការងារនៅសឹករងខេត្តព្រះសីហនុ មានទីលំនៅក្រុងព្រះសីហនុ ខេត្តព្រះសីហនុ ។
តាមការបំភ្លឺពីសាច់ញាតិ បានឲ្យដឹងថា មុនកើតហេតុ ជនរងគ្រោះបើករថយន្តផ្ទាល់ខ្លួន ធ្វើដំណើរតាំងពីខេត្តព្រះសីហនុ មកលេងដីចំការរបស់ឪពុកម្តាយ ដោយជាប់សោររបង ជនរងគ្រោះបានទៅយកកូនសោពីពូ ដែលរស់នៅក្នុងភូមិកើតហេតុ ចាក់បើកទ្វាររបងចូលទៅអង្គុយក្នុងរោងចំការ ម្នាក់ឯង ស្រាប់តែមួយសន្ទុះក្រោយមក ស្នូរផ្ទុះកាំភ្លើង បន្លឺឡើង ធ្វើឲ្យផ្អើលអ្នកភូមិ សាច់ញាតិបងប្អូន ក៏ដើរទៅមើល ស្រាប់តែប្រទះឃើញជនរងគ្រោះដេកស្លាប់បាត់ ដោយសារបាញ់សម្លាប់ខ្លួនឯង ។
សាច់ញាតិក៏បានបញ្ជាក់ផងដែរ មិនបានដឹងអំពីមូលហេតុ មិនដឹងថាមានវិប្បត្តិរឿងអ្វី ទើបឈានដល់សម្រេចចិត្តបញ្ចប់ជីវិតខ្លួនឯងបែបនេះ ។ក្រោយពីជនរងគ្រោះបាញ់ខ្លួនឯងហើយ ក្រុមគ្រួសាររាយការណ៍ទៅសមត្ថកិច្ច មូលដ្ឋាន សមត្ថកិច្ចជំនាញចុះទៅពិនិត្យ កោសល្យវិច័យ ឃើញថាពិតជាស្លាប់ដោយធ្វើអត្តឃាត រួចប្រគល់សពជូនក្រុមគ្រួសារចាត់ចែងរៀបចំធ្វើបុណ្យតាមប្រពៃណី ៕
