ការរត់ជាន់គ្នានៅមជ្ឈមណ្ឌលចែកចាយអាហារក្នុងកម្មវិធីបុណ្យរ៉ាម៉ាដានបានសម្លាប់មនុស្ស ១១ នាក់ក្នុងប្រទេសប៉ាគីស្ថាន
ប៉ាគីស្ថាន៖ ការរត់ជាន់គ្នានៅមជ្ឈមណ្ឌលចែកចាយអាហារបុណ្យរ៉ាម៉ាដានក្នុងទីក្រុង Karachi ភាគខាងត្បូងប្រទេសប៉ាគីស្ថាន បានសម្លាប់មនុស្សយ៉ាងហោចណាស់១១ នាក់ ទាំងស្ត្រី និងកុមារ នេះបើយោងតាមប៉ូលីស និងមន្ត្រីជួយសង្គ្រោះ។នេះបើតាមការចេញផ្សាយដោយសារព័ត៌មានAljazeeraនៅថ្ងៃទី១ ខែមេសា ឆ្នាំ២០២២។
មនុស្សជាច្រើននាក់ក៏បានរងរបួសដែរក្នុងឧប្បត្តិហេតុកាលពីថ្ងៃសុក្រនេះផងដែរ ដែលបានកើតឡើងនៅពេលដែលមនុស្សរាប់រយនាក់ភ័យស្លន់ស្លោ ហើយចាប់ផ្តើមរុញគ្នាទៅប្រមូលអាហារនៅខាងក្រៅ ។ មន្ត្រីប៉ូលីស Mughees Hashmi បាននិយាយថា ពួកគេខ្លះបានធ្លាក់ចូលទៅក្នុងប្រឡាយក្បែរនោះ។
អ្នកស្រុកបាននិយាយថា ជញ្ជាំងមួយក៏បានបាក់នៅក្បែរបំពង់បង្ហូរទឹកផងដែរ បណ្តាលឱ្យមនុស្សរងរបួស និងស្លាប់ចំពេលមានការរត់ជាន់គ្នានោះ ប្រព័ន្ធផ្សព្វផ្សាយក្នុងស្រុកបានរាយការណ៍ថា ស្ត្រី ៨ នាក់ និងកុមារ ៣ នាក់បានស្លាប់។
មន្ត្រីប៉ូលីស Hashmi បាននិយាយថា ម្ចាស់រោងចក្រដែលរៀបចំ អាហារមិនបានជូនដំណឹងដល់ប៉ូលីសអំពីផែនការនេះទេ។ លោកថា ប៉ូលិសមូលដ្ឋានមិនបានដឹងពីការចែកចាយនេះទេ បើមិនដូច្នេះទេពួកគេអាចនឹងដាក់ពង្រាយកម្លាំងនៅទីតាំងនោះ។រដ្ឋមន្ត្រីការបរទេស Bilawal Bhutto Zardari ដែលមកពីខេត្ត Sindh ដែលមានរដ្ឋធានី Karachi បានបញ្ជាឱ្យអាជ្ញាធរស៊ើបអង្កេតអ្វីដែលបណ្តាលឱ្យឧប្បត្តិហេតុនេះ៕
