(ហ្កាហ្សា)៖ ប្រធានមន្ទីរពេទ្យ Al Shifa ដែលជាមន្ទីរពេទ្យធំជាងគេបំផុតក្នុងតំបន់ហ្កាហ្សា ត្រូវបាន កងកម្លាំងអ៉ីស្រាអែលឃាត់ខ្លួនកាលពី ថ្ងៃព្រហស្បតិ៍សប្ដាហ៍នេះ ពាក់ព័ន្ធនឹងការសង្ស័យថាបានអនុញ្ញាតឱ្យក្រុមហាម៉ាសប្រើប្រាស់មន្ទីរពេទ្យជាទីបញ្ជាការយោធា។ នេះបើតាម ការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃសុក្រ ទី២៤ ខែវិច្ឆិកា ឆ្នាំ២០២៣។

ប្រធានមន្ទីរពេទ្យ Al Shifa លោក Mohammad Abu Salmiya ជាមនុស្សម្នាក់ត្រូវបានប្រព័ន្ធផ្សព្វផ្សាយអន្តរជាតិដកស្រង់ពាក្យសម្ដី ជាញឹកញាប់ពាក់ព័ន្ធនឹងស្ថានការណ៍នៅខាងក្នុងមន្ទីរពេទ្យមួយនេះដែលបានក្លាយជាគោលដៅដ៏សំខាន់មួយនៃប្រតិបត្តិការយោធាជើងគោក របស់អ៉ីស្រាអែល ចាប់តាំងពីក្រុមហាម៉ាសបើកការវាយប្រហារលើអ៉ីស្រាអែលកាលពីថ្ងៃទី៧ ខែតុលាមក។

នៅក្នុងសេចក្ដីថ្លែងការណ៍មួយ កងទ័ពអ៉ីស្រាអែលបានគូសបញ្ជាក់ដូច្នេះថា «ប្រធានមន្ទីរពេទ្យត្រូវបានឃាត់ខ្លួនសម្រាប់ការសួរចម្លើយ ក្រោយ មានភស្តុតាងបង្ហាញថាមន្ទីរពេទ្យ Al Shifa នៅក្រោមការគ្រប់គ្រងរបស់លោក ត្រូវបានប្រើប្រាស់ជាមូលដ្ឋានទីបញ្ជាការមួយរបស់ហាម៉ាស»៕