លោកឧត្តមសេនីយ៍ទោ គឹម សិរីវុឌ្ឍ ៖បញ្ជាក់ មូលហេតុដែលធ្វើឱ្យមានជនរងគ្រោះធ្លាក់ក្នុងបទល្មើសបច្ចេកវិទ្យា
ភ្នំពេញ៖កាលពីថ្ងៃទី១៣ ខែវិច្ឆិកា ឆ្នាំ២០២២នេះ លោកឧត្តមសេនីយ៍ទោ គឹម សិរីវុឌ្ឍ អនុប្រធាននាយកដ្ឋាន តំណាងឯកឧត្តម ឧត្តមសេនីយ៍ឯក ហោ សំអាត អគ្គលេខាធិការរង និងជាប្រធាននាយកដ្ឋានព័ត៌មានវិទ្យា នៃអគ្គលេខាធិការដ្ឋាន ក្រសួងមហាផ្ទៃ បានអញ្ជើញចូលរួមធ្វើជាវាគ្មិនចែករំលែកបទពិសោធន៍ស្តីពី “សន្តិសុខបទល្មើសបច្ចេកវិទ្យាឌីជីថលក្នុងសេដ្ឋកិច្ច និងសង្គម” ក្នុងកម្មវិធីពិព័រណ៍បច្ចេកវិទ្យាកម្ពុជា ២០២២ (Cambodia Tech Expo -CTX 2022) ក្រោមប្រធានបទ៖ «ដោះស្រាយបញ្ហាប្រឈមទាំងអស់គ្នាតាមរយៈមូលធនមានទេពកោសល្យបច្ចេកវិទ្យា» ដែលរៀបចំឡើងដោយក្រសួងឧស្សាហកម្មវិទ្យាសាស្រ្ត បច្ចេកវិទ្យា និងនវានុវត្តន៍ នៅមជ្ឈមណ្ឌលពិព័រណ៍កោះពេជ្រ។
ក្នុងកម្មវិធីពិព័រណ៍បច្ចេកវិទ្យាកម្ពុជា ២០២២លោកឧត្តមសេនីយ៍ទោ បានគូសបញ្ជាក់ថា មូលហេតុដែលធ្វើឱ្យមានជនរងគ្រោះធ្លាក់ក្នុងបទល្មើសបច្ចេកវិទ្យានេះ គឺដោយសារមានប្រជាពលរដ្ឋខ្លះមិនទាន់មានការប្រុងប្រយ័ត្នខ្ពស់ និងមិនមានការគ្រប់គ្រងប្រព័ន្ធបច្ចេកវិទ្យាផ្ទាល់ខ្លួនឱ្យបានល្អនៅឡើយ។ លោកឧត្តមសេនីយ៍ទោ បានបន្តថា ទន្ទឹមនេះយើងទាមទារឱ្យគ្រប់ស្ថាប័ន និងអង្គភាពដៃគូពាក់ព័ន្ធ គួរបន្តសហការគ្នាឱ្យបានស្អិតរមួតបន្ថែមទៀត ដើម្បីធ្វើយ៉ាងណាចូលរួមដោះស្រាយបញ្ហាសន្តិសុខបច្ចេកវិទ្យានៅព្រះរាជាណាចក្រកម្ពុជាឱ្យបានល្អប្រសើរ និងទប់ស្កាត់ឱ្យបានទាន់ពេលវេលា។
ជាមួយគ្នានេះដែរ លោកឧត្តមសេនីយ៍ទោ បានបញ្ជាក់ថា បច្ចុប្បន្ននេះ ក្រសួងមហាផ្ទៃ បាននឹងកំពុងខិតខំប្រឹងប្រែងយ៉ាងខ្លាំង ដើម្បីប្រយុទ្ធប្រឆាំងទៅនឹងកំណើននៃបទល្មើសបច្ចេកវិទ្យានេះ ដែលក្រសួងបានអនុវត្តនូវច្បាប់គតិយុត្តពាក់ព័ន្ធនានាជាច្រើន។ ស្របជាមួយគ្នានេះដែរ នាយកដ្ឋានព័ត៌មានវិទ្យា ក៏បានខិតខំប្រឹងប្រែងផ្សព្វផ្សាយព័ត៌មាន និងវីដេអូអប់រំផ្សេងៗជាច្រើន ដើម្បីជួយពន្យល់ និងផ្សព្វផ្សាយឱ្យប្រជាពលរដ្ឋបានយល់ដឹងទូលំទូលាយ និងមានការប្រុងប្រយ័ត្នលើសន្តិសុខផ្ទាល់ខ្លួនឱ្យបានល្អប្រកបដោយសុវត្ថិភាពខ្ពស់ ជៀសវាងការធ្លាក់ចូលក្នុងអន្ទាក់នៃបទល្មើសបច្ចេកវិទ្យានេះ។
នាឱកាសនោះ លោកឧត្តមសេនីយ៍ទោ បានមានប្រសាសន៍ចែករំលែកបទពិសោធន៍ពាក់ព័ន្ធនឹងសន្តិសុខបច្ចេកវិទ្យា (Cyber crime Security)ផងដែរថា បច្ចុប្បន្នក្រសួងមហាផ្ទៃ បាននឹងកំពុងខិតខំប្រឹងប្រែងយ៉ាងខ្លាំងជាមួយការឆ្លើយតបទៅនឹងការប្រយុទ្ធប្រឆាំងបទល្មើសបច្ចេកវិទ្យានេះ។ ជាមួយគ្នានេះដែរ លោកឧត្តមសេនីយ៍ទោ បានលើកឡើងបន្ថែមថា ដោយសារតែមានកត្តារីកចម្រើនយ៉ាងឆាប់រហ័សនៃការប្រើប្រាស់បច្ចេកវិទ្យានៅកម្ពុជា មន្ត្រីអនុវត្តច្បាប់ក៏កំពុងមានបញ្ហាប្រឈមជាច្រើនផងដែរ ក្នុងកិច្ចការអនុវត្តការងារសិក្សាស្រាវជ្រាវ ដោយសារ បទល្មើសខ្លះក៏បានវិវត្តន៍ និងកើតឡើងតាមរយៈប្រព័ន្ធបច្ចេកវិទ្យានេះផងដែរ។
លោកឧត្តមសេនីយ៍ទោ បានបញ្ជាក់ថា កន្លងមកនេះ បទល្មើសភាគច្រើន ដែលនាយកដ្ឋានព័ត៌មានវិទ្យា ទទួលបានពាក្យបណ្តឹងពីប្រជាពលរដ្ឋ គឺបទល្មើសឆបោកប្រាក់តាមបណ្តាញសង្គម និងបទល្មើសជំរិតទារប្រាក់, គំរាមកំហែងតាមរយៈរូបភាពបុគ្គលអាសអាភាស, បទល្មើសលួចបន្លំលេខកូដសម្ងាត់គណនីធនាគារ ដែលជនល្មើសប្រើប្រាស់មធ្យោបាយផ្សេងៗជាច្រើនដើម្បីប្រពឹត្តបទល្មើស តួយ៉ាងដូចជា ករណីលួចយកលេខកូដសម្ងាត់ធនាគារ គឺជនល្មើសប្រើគ្រប់មធ្យោបាយ ដូចជា តាមរយៈការលួងលោមជនរងគ្រោះផ្ញើលេខកូដឱ្យ ឬខ្ចីទូរស័ព្ទដៃពីជនរងគ្រោះ និងតាមរយៈរូបភាពផ្សេងៗទៀតដែលជនល្មើសអាចធ្វើទៅបានជាច្រើនទៀតផងដែរ។ លើសពីនេះទៀត គឺករណីឆបោកប្រាក់តាមប្រព័ន្ធបណ្តាញទំនាក់ទំនងសង្គម គឺបានកើតឡើងយ៉ាងសកម្ម និងមានរូបភាពឆបោកផ្សេងៗគ្នាផងដែរ។
«ពិព័រណ៍បច្ចេកវិទ្យាកម្ពុជា ២០២២» គឺជាកម្មវិធីដ៏ធំមួយដែលរៀបចំឡើងអមជាមួយកិច្ចប្រជុំកំពូលអាស៊ានដែលកម្ពុជាធ្វើជាម្ចាស់ផ្ទះ និងជាកម្មវិធីឈានមុខគេប្រចាំឆ្នាំលើកទីមួយរបស់ព្រះរាជាណាចក្រកម្ពុជា។ ពិព័របច្ចេកវិទ្យាកម្ពុជា ២០២២ គឺជាកម្មវិធីដែលរៀបចំឡើងក្នុងគោលបំណងដើម្បីបង្ហាញពីសក្តានុពល និងភាពរីកដុះដាលនៃអាជីវកម្មបច្ចេកវិទ្យាក្នុងស្រុក ក៏ដូចជាដើម្បីបង្កើតបណ្តាញទំនាក់ទំនង និងទាញយកចំណាប់អារម្មណ៍វិនិយោគិនពីក្រៅប្រទេសឱ្យងាកសម្លឹងមកកម្ពុជា និងប្រទេសក្នុងតំបន់អាស៊ាន ព្រមទាំងដើម្បីជំរុញវិស័យវិទ្យាសាស្រ្ត បច្ចេកវិទ្យា និងនវានុវត្តន៍ និងប្រព័ន្ធនវានុវត្តន៍ជាតិរបស់កម្ពុជា ដើម្បីឆ្លើយតប និងចូលរួមធ្វើឱ្យបានសម្រេចនូវយុទ្ធសាស្ត្រចតុកោណដំណាក់កាលទី៤ របស់រាជរដ្ឋាភិបាលអាណត្តិទី៦ គោលនយោបាយជាតិ ស្តីពី វិទ្យាសាស្រ្ត បច្ចេកវិទ្យា និងនវានុវត្តន៍ ឆ្នាំ២០២០-២០៣០ រួមទាំងផែនការយុទ្ធសាស្ត្រពាក់ព័ន្ធផ្សេងទៀត៕
