សិស្ស១៤នាក់ និងគ្រូបង្រៀនម្នាក់បានស្លាប់ក្នុងការបាញ់ប្រហារមួយនៅសាលាបឋមសិក្សាក្នុងរដ្ឋតិចសាស
តិចសាស៖ ខ្មាន់កាំភ្លើងម្នាក់បានបើកការបាញ់ប្រហារនៅសាលាបឋមសិក្សាមួយក្នុងរដ្ឋតិចសាសភាគខាងត្បូងដោយបានសម្លាប់សិស្សសាលា១៤នាក់ និងគ្រូបង្រៀនម្នាក់ ។នេះបើតាមអភិបាល លោក Greg Abbott បានប្រាប់អ្នកយកព័ត៌មាន។
លោក Greg Abbott បាននិយាយថា ជនសង្ស័យដែលត្រូវបានគេកត់សំគាល់បាន ឈ្មោះ Salvador Ramos មានអាយុ ១៨ឆ្នាំ បានសម្លាប់ខ្លួនឯងបន្ទាប់ពីការបាញ់ប្រហារ នេះបើយោងទៅតាមការអង្កេតដោយមន្រ្តីប៉ូលីសឆ្លើយតបទៅនឹងកន្លែងកើតហេតុ។ពាក់ព័ន្ធ ព័ត៌មានលម្អិតផ្លូវការអំពីឧបទ្ទវហេតុនៃការបាញ់ប្រហារនេះស្ថិតក្នុងការស៊ើបអង្កេតនៅឡើយ។ជាមួយគ្នានេះផងដែរ សារព័ត៌មាន CNN បានរាយការណ៍ថា ខ្មាន់កាំភ្លើងបានបើកឡានទៅសាលារៀន ហើយដើរចូលក្នុងសាលា ជាមួយកាំភ្លើងវែង និងកាំភ្លើងខ្លីមួយដើម។
ក្រុមគ្រូពេទ្យនៅរដ្ឋ San Antonio បាននិយាយនៅលើ Twitter ថា ខ្លួនបានទទួលអ្នកជំងឺ ២នាក់ ពីការបាញ់ប្រហារដែលជា កុមារម្នាក់ និងមនុស្សពេញវ័យម្នាក់។ អ្នកទាំង ២នាក់ជាស្ត្រីអាយុ៦៦ឆ្នាំ និងក្មេងស្រីអាយុ១០ឆ្នាំ ស្ថិតក្នុងស្ថានភាពធ្ងន់ធ្ងរ។
សូមបញ្ជាក់ថា នៅសាលាបឋមសិក្សា Robb ក្នុងទីក្រុង Uvalde រដ្ឋតិចសាស់ ចម្ងាយប្រហែល ៨០ ម៉ាយល៍ ពីភាគខាងលិចទីក្រុង San Antonio ៕NR
