ភ្នំពេញ៖ ស្ពានអាកាស និងផ្លូវក្រោមដីចោមចៅ បានស្ថាបនារួចរាល់ ១០០ភាគរយហើយៗ គ្រោង​នឹងបើកសម្ពោធជាផ្លូវការនៅថ្ងៃទី៣១ ខែមីនា ខាងមុខ ក្រោមអធិបតីភាពសម្ដេចតេជោ ហ៊ុន សែន នាយ​​ក​រដ្ឋមន្ត្រី។    នេះបើតាមការបញ្ជាក់ឱ្យដឹង ពីមន្ត្រីរដ្ឋបាលរាជធានីភ្នំពេញ នាព្រឹកថ្ងៃទី២៥ ខែមីនា ឆ្នាំ២០២២នេះ។

  ស្ពាននឹងមានអាយុកាល១០០ឆ្នាំ មានបំពាក់បង្គោលភ្លើងបំភ្លឺផ្លូវ រៀបចំបណ្តាញជុំវិញបរិវេណ​​ស្ពា​ន​អាកាស និងអាងស្តុក ទឹកក្រោមដី មានទាំងបំពាក់ម៉ូទ័របូមទឹកស្វ័យ​ប្រវត្តិផងដែរ។បើ​តាមម​ន្ដ្រីជំ​នា​ញរដ្ឋបាលរាជធានីភ្នំពេញបានបញ្ជាក់ថា ស្ពានអាកាស និងផ្លូវក្រោម ដីនៅចំណុចរង្វង់មូលចោ​ម​ចៅ​នេះ​ បា​នបើកការដ្ឋានដំណើរការសាងសង់ជាផ្លូវការ កាល ពីថ្ងៃទី២៩ ខែមិថុនា ឆ្នាំ២០១៨ ក្រោម​អ​​ធិបតីភាពដ៏ខ្ពង់ខ្ពស់សម្តេចអគ្គមហាសេនាបតីតេជោ ហ៊ុនសែន នាយករដ្ឋមន្ត្រី នៃព្រះរា​ជា​ណា​​ចក្រ​កម្ពុជា និងសម្តេចកិតិ្តព្រឹទ្ធបណ្ឌិត ប៊ុន រ៉ានី ហ៊ុនសែន ។

សូមបញ្ជាក់ថា   កាលពីថ្ងៃទី១៤ ខែមីនាកន្លងមកថ្មីៗនេះ លោក ឃួង ស្រេង អភិបាលរាជ​ធានីភ្នំ​ពេញ បានដឹកនាំមន្ត្រីជំនាញ និងក្រុមហ៊ុនទទួលម៉ៅការសាងសង់ ស្ពានអាកាស និងផ្លូវក្រោមដី ចុះពិនិត្យកា​រដ្ឋា​ននេះម្តងរួចហើយ និងបានសម្រេចដាក់ឱ្យ បងប្អូនប្រជាពលរដ្ឋបានធ្វើដំណើរឆ្លងកាត់ជាបណ្តោះ​អាសន្នកាលពីថ្ងៃទី២០ ខែមីនា។ ស្ពានអាកាស និងផ្លូវក្រោមដីចោមចៅ ជាគម្រោងរបស់រាជរដ្ឋាភិបា​លកម្ពុជា​តាម រយៈរដ្ឋ បាលរាជធានីភ្នំពេញ ទទួលម៉ៅការសាងសង់ដោយក្រុ​មហ៊ុនវិនិយោគ​ទុនអាណិ​ក ជន​កម្ពុជា(OCIC) ដោយប្រើប្រាស់ការសាងសង់ក្នុងរយៈពេល៣០ខែ និងចំណាយថវិកាសាង សង់ប្រ​មាណ២២លានដុល្លារអាម៉េរិក៕SP