មូស្គូ៖ ប្រធានាធិបតីអេហ្ស៊ីបបាននិយាយថា រាល់គំនិតផ្តួចផ្តើមរបស់រុស្ស៊ី លើកិច្ចសហប្រតិបត្តិការជាមួយអាហ្វ្រិក គឺទទួលបានការស្វាគមន៍។ នេះបើយោងតាមការចុះផ្សាយដោយទីភ្នាក់ងារសារព័ត៌មាន TASS នៅថ្ងៃទី២៧ កក្កដា ២០២៣។

ប្រធានាធិបតីរុស្ស៊ីលោក Vladimir Putin និងប្រធានាធិបតីអេហ្ស៊ីប Abdel Fattah El-Sisi បានជួបចរចាទ្វេភាគីនៅក្នុងវិមាន Konstantinovsky ស្ថិតក្នុងទីក្រុង Saint Petersburg មុនពេលពួកលោកត្រូវចូលរួមកិច្ចប្រជុំកំពូលរុស្ស៊ី-អាហ្រ្វិក។

លោក Abdel Fattah El-Sisi បាននិយាយថា “យើងតែងតែមានភាពវិជ្ជមានចំពោះគំនិតផ្តួចផ្តើមទាំងអស់ រួមទាំងពីខាងអ្នកផងដែរ ដែលទាក់ទងនឹងកិច្ចសហប្រតិបត្តិការទ្វេភាគី និងអន្តរកម្មនៅទ្វីបអាហ្រ្វិក។ យើងពិតជាចាប់អារម្មណ៍ក្នុងការពង្រឹងកិច្ចសហប្រតិបត្តិការទ្វេភាគីជាមួយរុស្ស៊ីក្នុងវិស័យផ្សេងៗ”។

ប្រធានាធិបតីអេហ្ស៊ីបក៏បានកត់សម្គាល់ផងដែរអំពីសារៈសំខាន់ជាពិសេសនៃគម្រោងលើការសាងសង់ដោយមានជំនួយពីសាជីវកម្មរដ្ឋរុស្ស៊ី Rosatom នៃរោងចក្រថាមពលនុយក្លេអ៊ែរដំបូង (NPP) នៅក្នុងទីក្រុង El Dabaa របស់អេហ្ស៊ីប។ លោកបាននិយាយថា “គម្រោងសាងសង់ El Dabaa NPP និងការបង្កើតតំបន់ឧស្សាហកម្មរុស្ស៊ីគឺសំខាន់នៅក្នុងកិច្ចសហប្រតិបត្តិការរបស់យើង” ។

គួរបញ្ជាក់ថា កិច្ចប្រជុំកំពូលរុស្ស៊ី-អាហ្រ្វិកលើកទី២ គ្រោងបាននិងកំពុងប្រព្រឹត្តទៅនៅទីក្រុង St. Petersburg របស់រុស្ស៊ី នៅថ្ងៃទី ២៧-២៨ ខែកក្កដា ដោយមានវេទិកាសេដ្ឋកិច្ច និងមនុស្សធម៌ ដែលត្រូវប្រព្រឹត្តទៅក្នុងពេលដំណាលគ្នា។ លើកនេះ ដូចគ្នានឹងឆ្នាំ២០១៩ ដោយគេដឹងថា កិច្ចប្រជុំកំពូលបែបនេះលើកដំបូងត្រូវបានធ្វើឡើង នៅទីក្រុង Sochi ក្នុងខែតុលា ពាក្យស្លោកគឺ “ដើម្បីសន្តិភាព សន្តិសុខ និងការអភិវឌ្ឍន៍”៕