អន្តរជាតិ ៖ មហាជនគ្រប់គ្នានៅចាំបានទេជាមួយនឹងតារាសម្ដែងជនជាតិឥណ្ឌា ជាតួរអង្គព្រះសម្មាសម្ពត ក្នុងរឿងពុទ្ធប្រវត្តិ ដែលមានភាពល្បីល្បាញ និងទទួលការគាំទ្រពីសំណាក់មហាជនដែលជាអ្នកកាន់ពុទ្ធសាសនាជាច្រើន។ នេះបើយោងតាមការចុះផ្សាយដោយទីភ្នាក់ងារសារព័ត៌មាន Kapook នៅថ្ងៃទី០៩ កុម្ភៈ ២០២២។

តារាសម្ដែងប្រុសរូបសង្ហារលោក កាកាន ដែលជាជនជាតិឥណ្ឌា ហើយលោកក៏ត្រូវបានគេស្គាល់ផងដែរថាជាតួសម្ដែងក្នុងរឿងពុទ្ធ ប្រវត្តិ រហូតទទួលបានការចាប់អារម្មណ៍ និងការគាំទ្រពីសំណាក់មហាជនគ្រប់គ្នានៅទូទាំងពិភពលោក ដែលជាអ្នកកាន់ពុទ្ធសាសនា។ ការសម្ដែងធ្វើជាតួរអង្គព្រះពុទ្ធរបស់លោកពិតជាស័ក្តិសម និង មានភាពប៉ិនប្រសព្វ ព្រមទាំងសម្ដែងបានល្អឥតខ្ចោះថែមទៀតផង។

ស្រាប់តែក្នុងពេលថ្មីៗនេះ លោក កាកាន បានធ្វើឱ្យមហាជនគ្រប់គ្នាមានការភ្ញាក់ផ្អើលជាខ្លាំង បន្ទាប់ពីរូបលោកបានបង្ហោះនូវរូបភាពកាន់ត្រៃនៃស្បង់ជីពរត្រៀមក្នុងការបួសចូលក្នុងព្រះពុទ្ធសាសនាស្ថិតនៅក្នុងប្រទេសថៃ។ ក្នុងនោះលោក កាកានក៏ធ្លាប់បានលាតត្រដាងពីតួនាទីរបស់ព្រះពុទ្ធក្នុងការ ផ្លាស់ប្តូរជីវិត និងអាកប្បកិរិយារបស់ព្រះអង្គទាំងស្រុង ដែលធ្វើឱ្យលោកមានបំណងចង់ចូលរួមក្នុងគម្រោងនិង សកម្មភាពសម្រាប់ពុទ្ធសាសនិកនៅប្រទេសថៃ និងសកម្មភាពផ្សព្វផ្សាយសាសនា ទន្ទឹមនឹងការប្រកាសខ្លួនជាពុទ្ធសាសនិកជន តាមរយៈការផ្សព្វផ្សាយធម៌អប់រំចិត្តជាប្រចាំតាមបណ្តាញសង្គមផ្ទាល់ខ្លួន ដែលការរៀបចំពិធីបួសនៅប្រទេសថៃលើកនេះ គឺមានគោលបំណងជួយផ្ដោតលើការលើកកម្ពស់ពុទ្ធសាសនិកជនឱ្យយល់ដឹងអំពីគោលការណ៍ គោលគំនិត ខ្លឹមសារនៃព្រះពុទ្ធសាសនា រួមទាំងការចូលរួមក្នុងការស្តារព្រះពុទ្ធសាសនាឱ្យមានភាពរីកចម្រើននិងនិរន្តរភាពទាំងក្នុង និងក្រៅប្រទេសផងដែរ ។

គួរបញ្ជាក់ផងដែរថា តារាសម្តែងឥណ្ឌាលោក កាកាន  ត្រូវបានគេស្គាល់នៅក្នុងវិស័យកម្សាន្តទាំងនៅក្នុងហូលីវូដនិងពិភពលោក និងក្នុងខ្សែភាពយន្តវីរភាព និងរឿងភាគទូរទស្សន៍ជាច្រើន ហើយក៏ទទួលបានពានរង្វាន់សម្រាប់តារាសម្តែងនាំមុខគេផងដែរ នៅមហោស្រពភាពយន្តព្រះពុទ្ធសាសនាពិភពលោក ដែលរៀបចំដោយអង្គការសហប្រជាជាតិ ពីការងារបង្កើតពិភពលោកដ៏ល្បីល្បាញក្នុងតួនាទីដែលលោកបាននឹងកំពុងលេងជាតួព្រះពុទ្ធ ក្នុងរឿងពុទ្ធប្រវត្តិជាម្ចាស់ដ៏ឧត្តមនៃពិភពលោក៕