ក្រុងគៀវ៖ កងទ័ពអ៊ុយក្រែនថា ខ្លួនបានបំបែកការឡោមព័ទ្ធរបស់កងទ័ពរុស្ស៊ីចេញពីតំបន់ជាយក្រុងគៀវ គឺក្រុង Makariv ដោយជោគជ័យហើយ ខណៈប្រទេសនេះនៅបន្តប្រយុទ្ធប្រឆាំងនឹងការឈ្លានពានដែលធ្វើឡើងដោយប្រទេសជិតខាងរបស់ខ្លួន ចាប់តាំងពីថ្ងៃទី២៤ ខែកុម្ភៈ។ នេះបើយោងការចុះផ្សារដោយទីភ្នាក់ងារសារព័ត៌មាន USA Today នៅថ្ងៃទី២៣ មីនា ២០២២។

អគ្គសេនាធិការនៃកងកម្លាំងប្រដាប់អាវុធអ៊ុយក្រែនបានរាយការណ៍ថា«ទង់ជាតិអ៊ុយក្រែនពេលនេះត្រូវបានលើកឡើងវិញនៅក្រុង Makariv ហើយកងកម្លាំងរុស្ស៊ីក៏បានដកថយដែរ»។ នេះមានន័យថា រុស្ស៊ីមិនអាចឡោមព័ទ្ធក្រុងគៀវពីភាគពាយ័ព្យបាននោះទេ។ 

គួរបញ្ជាក់ដែរថា ក្រុង Makariv ដែលស្ថិតនៅចម្ងាយប្រហែល ៦០គីឡូម៉ែត្រភាគខាងលិចនៃក្រុងគៀវ ត្រូវបានទទួលរងនូវការវាយប្រហារជាបន្តបន្ទាប់ក្នុង រួមទាំងការវាយប្រហារលើឧស្សាហកម្មដុតនំមួយកន្លែងនៅក្នុងទីក្រុង ដែលបានបណ្តាលឱ្យមនុស្ស ១៣នាក់បាត់បង់ជីវិត៕RT