(អាមេរិក)៖ទីបំផុតប្រធានាធិបតីអាមេរិកលោក ដូណាល់ ត្រាំ ត្រូវបានគេប្រទះឃើញថាបានពាក់ម៉ាស់ពណ៌ខ្មៅ នៅពេលដែលគាត់បានទៅជួបជាមួយទាហានដែលរងរបួស និងបុគ្គលិកថែទាំសុខភាពជួរមុខ នៅឯមន្ទីរពេទ្យវេជ្ជសាស្ត្រយោធាមួយនៅខាងក្រៅទីក្រុងវ៉ាស៊ីនតោន កាលពីថ្ងៃទី១២ ខែកក្កដា ឆ្នាំ២០២០ ម្សិលមិញនេះ។ នៅក្នុងដំណើរទស្សនកិច្ចនៅមជ្ឈមណ្ឌលវេជ្ជសាស្ត្រយោធាជាតិ Walter Reed គេបានសម្គាល់ថា វាជាលើកដំបូងបំផុតដែលលោក ដូណាល់ ត្រាំ បានពាក់ម៉ាស់ ព្រោះថាប្រធានាធិបតីរូបនេះតែងតែជំទាស់មិនព្រមពាក់ម៉ាស់រហូតមក ទោះបីអាមេរិកមានករណីអ្នកឆ្លងជំងឺ COVID-19 ហក់ឡើងដល់លេខ១ទាំងតួលេខស្លាប់ និងឆ្លងសរុបក៏ដោយ។ ពោលគឺសហរដ្ឋអាមេរិកមានករណីសរុបចំនួន ៣.៤ លាននាក់ ខណៈមានអ្នកស្លាប់ចំនួន ១៣៧,០០០នាក់ គិតមកទល់ពេលនេះ។បើតាមការលើកឡើងពីមតិរបស់អ្នកវិភាគជាច្រើនបានលើកឡើងស្រដៀងៗគ្នាថា ការដែលលោក ត្រាំសម្រេចចិត្តពាក់ម៉ាស់នេះគឺដោយសារតែលោក បានយល់ស្របជាមួយមតិទីប្រឹក្សារបស់លោក ថាអាចនឹងទាក់ទាញសម្លេងឆ្នោតបន្ថែមជុំវិញអ្នកគាំទ្ររបស់លោកដើម្បីបន្តការប្រកួតប្រជែងការបោះឆ្នោតនាពេលខាងមុខ ជាមួយការបន្ទន់ឥរិយាបថរបស់លោកត្រាំ៕ PP