SEOUL៖ ប្រព័ន្ធផ្សព្វផ្សាយរដ្ឋកូរ៉េខាងជើង KCNA បានរាយការណ៍ ដោយដកស្រង់សម្តីរបស់អនុរដ្ឋមន្រ្តីការបរទេស លោក Ri Thae Song នៅថ្ងៃសុក្រនេះថា ការអំពាវនាវរបស់កូរ៉េខាងត្បូងដើម្បីប្រកាសបញ្ចប់សង្គ្រាមកូរ៉េជាផ្លូវការគឺឆាប់ពេក ព្រោះគ្មានការធានាថាវានឹងនាំឱ្យមានការដក “គោលនយោបាយអរិភាពរបស់អាមេរិក” ឆ្ពោះទៅទីក្រុងព្យុងយ៉ាងឡើយ។

ប្រធានាធិបតីកូរ៉េខាងត្បូង លោក មូន ជេអ៊ីន នៅថ្ងៃអង្គារនេះ បានអំពាវនាវម្តងហើយម្តងទៀតឱ្យបញ្ចប់សង្គ្រាមកូរ៉េជាផ្លូវការនៅក្នុងសុន្ទរកថាមួយទៅកាន់មហាសន្និបាតអង្គការសហប្រជាជាតិ ហើយបានស្នើឱ្យកូរ៉េទាំងពីរជាមួយសហរដ្ឋអាមេរិក ឬជាមួយសហរដ្ឋអាមេរិកនិងចិន បង្កើតកិច្ចព្រមព្រៀងបែបនេះ។ 

ជាក់ស្តែង កូរ៉េទាំងពីរនៅតែមានសង្រ្គាមតាមបច្ចេកទេស បន្ទាប់ពីជម្លោះ ១៩៥០-១៩៥៣ របស់ពួកគេ បានបញ្ចប់ដោយបទឈប់បាញ់ជាជាងសន្ធិសញ្ញាសន្តិភាព។

លោក Ri Thae Song បាននិយាយនៅលើប្រព័ន្ធ KCNA ដោយប្រើឈ្មោះសាធារណរដ្ឋប្រជាមានិតកូរ៉េផ្លូវការរបស់កូរ៉េខាងជើងថា “គ្មានអ្វីនឹងផ្លាស់ប្តូរឡើយដរាបណាស្ថានភាពនយោបាយនៅជុំវិញកូរ៉េខាងជើងនៅតែមិនផ្លាស់ប្តូរ ហើយគោលនយោបាយអរិភាពរបស់អាមេរិកមិនត្រូវបានផ្លាស់ប្តូរទេ ទោះបីការបញ្ចប់សង្គ្រាមត្រូវបានប្រកាសរាប់រយដងក៏ដោយ” ។ 

“អាមេរិកដកចេញស្តង់ដារទ្វេរដងនិងគោលនយោបាយអរិភាពរបស់ខ្លួនគឺជាអាទិភាពកំពូលក្នុងការធ្វើឱ្យស្ថានការណ៍នៅឧបទ្វីបកូរ៉េមានស្ថិរភាពនិងធានាសន្តិភាពនៅលើនោះ” លោក Ri Thae Song បន្ថែម ។

នៅថ្ងៃសុក្រ លោក មូន ជេអ៊ីន បាននិយាយថា លោកមានទំនុកចិត្តថា ទីក្រុងព្យុងយ៉ាងនឹងដឹងថា វាជាចំណាប់អារម្មណ៍មួយក្នុងការមកពិភាក្សាជាមួយទីក្រុងវ៉ាស៊ីនតោន ប៉ុន្តែមិនប្រាកដថាពេលវេលានោះនឹងមកដល់ក្នុងអំឡុងអាណត្តិរបស់លោកដែលត្រូវបញ្ចប់នៅឆ្នាំ ២០២២ ដែរឬអត់នោះទេ។ លោក មូន ជេអ៊ីន បាននិយាយជាមួយអ្នកយកព័ត៌មាននៅលើយន្តហោះប្រធានាធិបតីកូរ៉េខាងត្បូងនៅពេលដែលលោកបានហោះត្រឡប់មកទីក្រុងសេអ៊ូលពីសហរដ្ឋអាមេរិក បន្ទាប់ពីថ្លែងទៅកាន់មហាសន្និបាតអង្គការសហប្រជាជាតិ។

គួររំលឹកថា វាហាក់បីដូចជា កូរ៉េខាងជើងនៅតែថ្លឹងថ្លែងពីជម្រើស ខណៈពេលដែលបើកទ្វារសម្រាប់ការចរចា ព្រោះវាគ្រាន់តែបង្កើនភាពតានតឹងក្នុងកម្រិតទាបប៉ុណ្ណោះដែលគ្រប់គ្រាន់សម្រាប់អាមេរិកក្នុងការមិនផ្តាច់ទំនាក់ទំនងទាំងអស់។ NR