ភ្នំពេញ ៖ អ្នកនាំពាក្យក្រសួងការបរទេស និងសហប្រតិបត្តិការអន្តរជាតិ លោក ជុំ សុន្ទរី បានឲ្យដឹងថា រហូតមកដល់ពេលនេះ ស្ថានទូតកម្ពុជា ប្រចាំប្រទេសថៃ ពុំទាន់ទទួលបានការបញ្ជាក់ណាមួយ ថា ករណីស្រ្តីជនជាតិថៃ ដែលរងការជួញដូរសរីរាង្គ កើតមានឡើងនៅប្រទេសកម្ពុជាទេ។ 

ការលេីកឡេីងរបស់លោក ជុំ សុន្ទរី ក្រោយពីមានការចុះផ្សាយក្នុង Thai Examiner ថ្ងៃទី ១២ ខែមិនា ឆ្នាំ២០២២ អំពីករណីមានស្រ្តីជនជាតិថៃម្នាក់ បានអះអាងថា ខ្លួនបានប្រឈមនឹងគ្រោះថា្នក់នៃការជួញដូរសរីរាង្គនៅកម្ពុជា។ 

តាមសេចក្ដីបំភ្លឺរបស់ លោក ជុំ សុន្ទរី នាថ្ងៃទី១៣ មីនា ថា អាជ្ញាធរមានសមត្ថកិច្ចខេត្តព្រះសីហនុ បានប្រកាសបដិសេធរួចហើយថានោះ គឺជាការលើកឡើងដោយគ្មានមូលដ្ឋានត្រឹមត្រូវពិតប្រាកដ។

លោក បានបញ្ជាក់ថា "ទន្ទឹមនឹងនេះ  ស្ថានទូតកម្ពុជាប្រចាំនៅប្រទេសថៃ ក៏បានទាក់ទងជាមួយអាជ្ញាធរមានសមត្ថកិច្ចថៃ ស្វែងរកការបញ្ជាក់លើព័ត៌មាននេះ តែរហូតមកដល់ ពេលនេះ (ព្រឹកថ្ងៃទី១៣ ខែមិនា) ពុំទាន់ទទួលបានការ បញ្ជាក់ណាមួយ ថានេះជាករណីដែលបានកើតមានឡើងនៅកម្ពុជា ដូចព័ត៌មានដែលបានផ្សាយនោះឡើយ"។ 

អ្នកនាំពាក្យក្រសួងការបរទេស បានបន្ដថា ស្ថានទូតកម្ពុជា ប្រចាំប្រទេសថៃ កំពុងបន្តទាក់ទងជាមួយអាជ្ញាធរមានសមត្ថកិច្ចថៃ រកព័ត៌មានបន្ថែមទៀត៕