ភ្នំពេញ ៖ អ្នកនាំពាក្យគណបក្សប្រជាជនកម្ពុជា លោក សុខ ឥសាន បានចំអកចំអនឲ្យមេដឹកនាំក្រុមឧទ្ទាមក្រៅច្បាប់ទណ្ឌិត សម រង្ស៉ី ថា ពិតជាយីអ៊ុនដាក់ អារក្សជាន់មែន ក្រោយពីតុលាការបារាំងចោទប្រកាន់ លោកពីបទ «បរិហារកេរ្តិ៍ជាសាធារណៈលើបុគ្គល» តាមពាក្យបណ្តឹង សម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា និងបណ្តឹងលោក ឌី វិជ្ជា អគ្គស្នងការរង នគរបាលជាតិ។

ថ្មីៗនេះ តុលាការទីក្រុងប៉ារីស ប្រទេសបារាំង បានសម្រេចដាក់ឲ្យទណ្ឌិត សម រង្ស៊ី ស្ថិតនៅក្រោមការចោទប្រកាន់ពីបទ«បរិហារកេរ្តិ៍ជាសាធារណៈ លើបុគ្គល»ធ្វើឡើងតាមបណ្តឹង សម្តេចតេជោ និងលោក ឌី វិជ្ជា។

ជុំវិញបញ្ហានេះ លោក សុខ ឥសាន បានសរសេរសារ នៅក្នុងតេឡេក្រាមក្រុមអ្នកសារព័ត៌មាន នៅថ្ងៃទី១៨ ខែមិថុនា ឆ្នាំ២០២០ ថា «ចៅក្រមស៊ើបសួរតុលាការព្រហ្មទ័ណ្ឌបារាំងបានចោទប្រកាន់ទណ្ឌិតមេឧទ្ទាមក្រៅច្បាប់(សម រង្ស៊ី)ពីបទបរិហារកេរ្តិ៍ជាសាធារណៈលើបុគ្គល តាមបណ្តឹងរបស់ សម្តេចតេជោ ហ៊ុន សែន ពិតជាយីអ៊ុនដាក់ អារក្សជាន់ មកដល់ហើយ»។

សូមរំលឹកថា សម្តេចតេជោ ហ៊ុន សែន និងលោក ឌី វិជ្ជា បានដាក់ពាក្យបណ្ដឹងប្តឹងទណ្ឌិតសម រង្ស៊ី នៅតុលាការប្រទេសបារាំង ដែលជាកន្លែងរស់នៅអចិន្ត្រៃយ៍របស់ ទណ្ឌិត សម រង្ស៊ី ដោយសារតែ ទណ្ឌិត សម រង្ស៊ី បានចោទប្រកាន់គ្មានការពិតថា សម្តេចតេជោ ជាអ្នករៀបចំគម្រោងសម្លាប់ លោក ហុក ឡង់ឌី ដែលជាឪពុករបស់លោក ឌី វិជ្ជា ហើយថាសព្វថ្ងៃលោក ឌី វិជ្ជា ដែលជាស្វាមីរបស់លោកស្រី ហ៊ុន ម៉ាណា កំពុងរកវិធីសងសឹក ឲ្យឪពុករបស់លោកខ្លួន៕EB