មនុស្សជាង ១ម៉ឺននាក់ ធ្វើដំណើរចូលទៅប្រទេសអេហ្ស៊ីប ក្នុងរយៈពេល៥ថ្ងៃ ខណៈអំពើហិង្សានៅស៊ូដង់ នៅតែបន្ត
1 ឆ្នាំ មុន
(បរទេស)៖ អាជ្ញាធររបស់ប្រទេសអេហ្ស៊ីប បានប្រកាសនៅក្នុងសេចក្តីថ្លែងការណ៍មួយថា មនុស្សជាង១ម៉ឺននាក់ ដែលមានសញ្ជាតិផ្សេងៗគ្នាបានភៀស ខ្លួនចេញពីប្រទេសស៊ូដង់ ដែលកំពុងមានជម្លោះ និងបានទៅដល់ប្រទេសអេហ្ស៊ីប តាមរយៈច្រកព្រំដែនគោកក្នុងរយៈពេលប្រាំថ្ងៃចុងក្រោយនេះ។នេះបើតាមសេចក្តីរាយការណ៍ដោយទីភ្នាក់ងារសារព័ត៌មាន CNA នៅថ្ងៃទី២៧ ខែមេសា ឆ្នាំ២០២៣។
សេចក្តីថ្លែងការណ៍បាននិយាយថា ចាប់ពីថ្ងៃទី ២១ ដល់ ២៥ ខែមេសា មនុស្ស១២៩៧ នាក់បានចូលទៅកាន់ប្រទេសអេហ្ស៊ីប តាមរយៈ តំបន់ហ្កាសតាល ហើយ ៨៨៩៧ នាក់ផ្សេង ទៀតបានឆ្លងកាត់ ចូលទៅក្នុងប្រទេសអេហ្ស៊ីបតាមរយៈ តំបន់អាកឃ្វីន។
អង្គការ GALDP បាននិងកំពុងសម្របសម្រួលជាមួយអង្គការពាក់ព័ន្ធទាំងអស់ ដើម្បីធានាថាជនជាតិអេហ្ស៊ីប និងជនបរទេសដែលបានភៀសខ្លួនចេញពីប្រទេសស៊ូដង់ មានសិទ្ធិចូលទៅកាន់អេហ្សុីបគ្រប់មធ្យោបាយទាំងអស់។ ការប៉ះទង្គិចគ្នាយ៉ាងសាហាវ បានផ្ទុះឡើងរវាងកងទ័ពស៊ូដង់ និងកងកម្លាំងគាំទ្ររហ័សប៉ារ៉ាយោធាកាលពីថ្ងៃទី ១៥ ខែមេសា នៅក្នុងរដ្ឋធានី ខាតធួម (Khartoum) និងតំបន់ស៊ូដង់ផ្សេងទៀត។
រហូតមក ដល់ពេលនេះ មនុស្សជាង ៤០០ នាក់ត្រូវបានសម្លាប់ ខណៈជាង ៤០០០ នាក់ទៀតរងរបួសនៅក្នុងប្រទេសស៊ូដង់ នេះបើយោងតាមទិន្នន័យពី ក្រសួងសុខា ភិបាលស៊ូដង់។ ភាគីជម្លោះបានយល់ព្រមលើបទឈប់បាញ់រយៈពេលបីថ្ងៃ ដោយចាប់ផ្តើមពីពាក់កណ្តាលអធ្រាត្រថ្ងៃចន្ទ ខណៈដែលប្រទេសជាច្រើនកំពុងប្រជែងគ្នាដើម្បីជម្លៀសអ្នកការទូត និងពលរដ្ឋរបស់ពួកគេចេញពីប្រទេសស៊ូដង់៕
