ភ្នំពេញ៖ សម្ដេចធិបតី ហ៊ុន ម៉ាណែត នាយករដ្ឋមន្រ្តី បានជួយកម្លាំងដោះមីន២១០នាក់ ដែលប្រឈមបាត់បង់ការងារ ក្រោយអាម៉េរិកផ្អាកផ្ដល់ជំនួយ ឱ្យបន្តការងារធម្មតាវិញ។ នេះជាការបញ្ជាក់របស់ លោក ហេង រតនា អគ្គនាយកមជ្ឈមណ្ឌលកម្ចាត់មីនកម្ពុជា (CMAC) នៅលើទំព័រហ្វេសប៊ុកផ្ទាល់ខ្លួន កាលពីថ្ងៃទី១៥ ខែកុម្ភៈ កន្លងទៅ។

លោក ហេង រតនា បានសរសេរបញ្ជាក់ថា «នៅកងឯកភាពកំចាត់មីនទី៥ ខេត្តត្បូងឃ្មុំ ខ្ញុំនិងថ្នាក់ដឹកនាំអង្គភាពស៊ីម៉ាក់ បានជួបសំណេះសំណាលផ្សព្វផ្សាយអំពីការកែសំរួលកម្លាំង​និងបុគ្គលិកស្ថិតនៅក្រោមគម្រោងជំនួយរបស់សហរដ្ឋអាមេរិកដែលគាំទ្រមកអង្គភាពសុីម៉ាក់។  ខ្ញុំបានបញ្ជាក់ជូនកងកម្លាំងទាំងអស់ជ្រាបច្បាស់ថា​ សម្តេចមហាបវរធិបតី​ ប្រមុខរាជរដ្ឋាភិបាលបានយកចិត្តទុកដាក់​និងបន្តគាំទ្រពេញទំហឹងអនុញ្ញាតិឱ្យអង្គភាពCMAC​រៀបចំនិងកែសម្រួលកម្លាំងចំនួន២១០នាក់ ដែលបានរងផលប៉ះពាល់ដោយសារការផ្អាកនិងកាត់រំសាយក្នុងគម្រោងជំនួយសហរដ្ឋអាម៉េរិកនេះ​ នៅបន្តភារកិច្ចរបស់ខ្លួនក្នុងអង្គភាពជាធម្មតា​ ដេីម្បីបន្តអនុវត្តន៍កិច្ចប្រតិបត្តិការបោសសម្អាតគ្រាប់មីននិងសំណល់យុទ្ធភណ្ឌសង្គ្រាមជូនប្រជាពលរដ្ឋតាមសំនូមពរ»។