អាជ្ញាធរខណ្ឌដង្កោ បានឲ្យដឹងថា សត្វក្រពើទម្ងន់ជាង៣០គីឡូក្រាម ដែលរួចពីកសិដ្ឋានមួយកាលពីប៉ុន្មានថ្ងៃមុន នៅខណ្ឌដង្កោ ដោយសារទឹកជន់លិច ត្រូវបានអាជ្ញាធរ រកឃើញ និងចាប់បានវិញហើយនៅល្ងាចថ្ងៃទី១៧ ខែតុលា ឆ្នាំ២០២០នេះ ស្ថិតនៅភូមិក្រាំងស្វាយ សង្កាត់ព្រែកកំពឹស។

តាមសេចក្ដីរាយការណ៍ បានឲ្យដឹងថា ក្រពើមួយក្បាល ដែលរួចចេញពីកសិដ្ឋានកាលពីប៉ុន្មានថ្ងៃមុននោះ ត្រូវកម្លាំងសមត្ថកិច្ចប៉ុស្ដិ៍សង្កាត់ព្រែកកំពិស និងប្រជាការពារតាមចាប់បានមកវិញហើយ។

បើតាមសេចក្ដីរាយការណ៍ ក្រោយចាប់បានសមត្ថកិច្ចប្រគល់ក្រពើមួយក្បាលនេះ ជូនម្ចាស់កសិដ្ឋានវិញ និងបានណែនាំម្ចាស់ទីតាំង ត្រូវបង្កើនពង្រឹងការយកចិត្តទុកដាក់បន្ថែមទៀត ដើម្បីរក្សាសុវត្ថិភាព។

សូមបញ្ជាក់ថា កាលពីព្រឹកថ្ងៃទី១៥ ខែតុលា ឆ្នាំ២០២០ សត្វក្រពើមួយក្បាលនេះ បានរួចចេញពីកសិដ្ឋានមួយកន្លែងនៅភូមិក្រាំងស្វាយ សង្កាត់ព្រែកកំពិស ខណ្ឌដង្កោ ទីដែលកំពុងរងនូវការវាយប្រហារដោយទឹកជំនន់យ៉ាងធ្ងន់ធ្ងរ៕ SP