The New York Times ប្តឹងក្រុមហ៊ុន OpenAI និង Microsoft ក្រោយប្រើប្រាស់អត្ថបទរាប់លានដើម្បីបង្កើតផលិតផលរបស់ខ្លួន ដោយគញមានការអនុញ្ញាត
អាមេរិក៖ពាក្យបណ្តឹងនេះបានអះអាងថា ក្រុមហ៊ុន OpenAI និង Microsoft បានទាញយកផលប្រយោជន៍ពីការវិនិយោគដ៏ធំរបស់កាសែត The New York Times ក្នុងវិស័យសារព័ត៌មាន ដោយប្រើប្រាស់អត្ថបទដើម្បីបង្កើតផលិតផលរបស់ខ្លួន ដោយគ្មានការអនុញ្ញាត ឬការទូទាត់តម្លៃ។
កាសែត The New York Times ដែលជាស្ថាប័នព័ត៌មានដ៏ធំកំពុងស្វែងរកសំណងសម្រាប់ការខាតបង់ ដោយបញ្ជាឱ្យក្រុមហ៊ុនឈប់ប្រើប្រាស់ខ្លឹមសាររបស់ខ្លួន និងបំផ្លាញទិន្នន័យដែលប្រមូលបានពីមុន។ កាសែត The New York Times បានចោទប្រកាន់ថា ការរំលោភនេះអាចបណ្តាលឱ្យមានការខាតបង់ជាច្រើនពាន់លានដុល្លារនៅក្នុងច្បាប់ និងការខូចខាតជាក់ស្តែង។
ក្រុមហ៊ុន Microsoft ដែលជាក្រុមហ៊ុនធំទីពីររបស់ពិភពលោកដោយមូលធនប័ត្រទីផ្សារ គឺជាអ្នកវិនិយោគធំបំផុតនៅក្នុង OpenAI ហើយបានអនុវត្តយ៉ាងរហ័សនូវអំណាចនៃ AI នៅក្នុងផលិតផលរបស់ខ្លួនបន្ទាប់ពីការចេញផ្សាយ ChatGPT កាលពីឆ្នាំមុន។
ពាក្យបណ្តឹងនេះអះអាងថា ការប្រើប្រាស់អត្ថបទរបស់ការសែត The New York Times ដោយខុសច្បាប់ដើម្បីបង្កើតផលិតផលបញ្ញាសិប្បនិមិត្ត បានបង្កើតគូប្រជែងដ៏មានសក្តានុពល និងគំរាមកំហែងដល់សមត្ថភាពរបស់ខ្លួនក្នុងការផ្តល់សារព័ត៌មានប្រកបដោយគុណភាព។ ឧបករណ៍ត្រូវបានបង្កើតឡើងដោយប្រើ និងបន្តប្រើប្រាស់សារព័ត៌មានឯករាជ្យ និងខ្លឹមសារដែលពួកគេបានរាយការណ៍ កែសម្រួល និងត្រួតពិនិត្យដោយមានជំនាញច្រើន៕
