ថៃ៖ រោងចក្រផលិតទឹកកក Banglamung Ltd ក្នុងស្រុក Bang Lamung នៃខេត្ត Chonburi ក្នុងប្រទេសថៃ មានការលេចធ្លាយឧស្ម័នអាម៉ូញាក់បង្កជាភាពស្លន់ស្លោ និងប៉ះពាល់ដល់មនុស្សជាង១០០នាក់។នេះបើតាមការចេញផ្សាយដោយសារព័ត៌មាន The Nation នៅថ្ងៃទី ១៨ ខែមេសា ឆ្នាំ២០២៤។
ឧបទ្ទវហេតុនេះ កើតឡើងនៅម៉ោង ១១.៣៦នាទីយប់ថ្ងៃពុធទី១៧ខែមេសា ហើយភ្លាមៗនោះ ក្រុមអ្នកជួយសង្គ្រោះ បានប្រញាប់ប្រញាល់ទៅកន្លែងកើតហេតុ ខណៈកម្មករនៅរោងចក្រនិងអ្នកស្រុក ក្នុងរង្វង់ចម្ងាយពីរគីឡូម៉ែត្រ ត្រូវបានជម្លៀសចេញភ្លាមៗ បន្ទាប់មកមានផ្សែងហុយ ហើយក្រោយពេលពួកគេប៉ះជាមួយឧស្ម័នដែលធ្លាយ ស្រាប់តែរលាកភ្នែក និងច្រមុះ លើសពីនេះ ដល់ថ្នាក់មានមនុស្សមួយចំនួន បាត់បង់ស្មារតីទៀតផង។
អាជ្ញាធរមូលដ្ឋាននិយាយថា អ្នករបួសចំនួន១២៨នាក់ ទទួលការព្យាបាលបឋមនៅកន្លែងកើតហេតុ ក្រោយមកក៏ត្រូវបញ្ជូនទៅមន្ទីរពេទ្យនានា។ស្របពេលជាមួយគ្នានោះដែរ មន្ត្រីសុខាភិបាលស្រុក Bang Lamung បានណែនាំអ្នកស្រុក សូមកុំទទួលទានអាហារណាមួយដែលអាចប៉ះពាល់នឹងឧស្ម័នអាម៉ូញាក់ដែលលេចធ្លាយនេះ ឲ្យសោះ៕
