បរទេស៖ សហរដ្ឋអាមេរិក និងអង់គ្លេស បានប្រកាសកាលពីថ្ងៃពុធថា ខ្លួនបានបង្រ្កាបលើបណ្តាញលាងលុយកខ្វក់សកល ដែលពួកមហាសេដ្ឋីរុស្ស៊ីប្រើប្រាស់ដើម្បីគេចចេញពីការដាក់ទណ្ឌកម្ម និងដែលលាងលុយឱ្យក្រុមអ្នកជួញដូរគ្រឿងញៀន ឧក្រិដ្ឋជន និងចារកម្មជាដើម។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។ 

ទីភ្នាក់ងារប្រឆាំងឧក្រិដ្ឋកម្មជាតិរបស់ចក្រភពអង់គ្លេស (NCA) បាននិយាយថា កិច្ចខិតខំប្រឹងប្រែងអនុវត្តច្បាប់ដែលសម្របសម្រួលជាអន្តរជាតិ និងមានឈ្មោះកូដប្រតិបត្តិការថា «Operation Destabilise» បានបង្រ្កាបដល់បណ្ដាញលាងលុយ ដែលគ្រប់ដណ្ដប់លើប្រទេសចំនួន ៣០ នៅទូទាំងពិភពលោក។ 

NCA បន្តថា ប្រតិបត្តិការដដែល ក៏មានការចូលរួមផងដែរពីអាជ្ញាធរក្នុងប្រទេសបារាំង អៀរឡង់ និងអារ៉ាប់រួម។ រហូតមកដល់ពេលនេះ ប្រតិបត្តិការបាននាំឱ្យមានការចាប់ខ្លួន មនុស្សចំនួន ៨៤ នាក់ និងការរឹបអូសប្រាក់សុទ្ធ និងលុយគ្រីបតូ សរុបជាង ២៥ លានដុល្លារ។ 

ចំណែកឯក្រសួងរតនាគារសហរដ្ឋអាមេរិកវិញ បាននិយាយថា ខ្លួនបានដាក់ទណ្ឌកម្មលើបុគ្គល និងអង្គភាពនៃបណ្ដាញឧក្រិដ្ឋជនដែលបានជួយឥស្សរជនរុស្ស៊ីឱ្យប្រើប្រាស់លុយគ្រីបតូ ដើម្បីគេចពីទណ្ឌកម្មរបស់លោកខាងលិច ដែលដាក់ចេញក្រោយរុស្ស៊ីចូលឈ្លានពានអ៊ុយក្រែនទ្រង់ទ្រាយធំ នៅខែកុម្ភៈ ឆ្នាំ ២០២២។ 

សូមបញ្ជាក់ថា បណ្ដាញឧក្រិដ្ឋជនធំៗ២ ដែលមានឈ្មោះថា «TGR Group» និង «Smart» ថែមទាំងបានជួយបុគ្គលរងទណ្ឌកម្មរុស្ស៊ី ឱ្យអាចចូលប្រើប្រាស់ប្រព័ន្ធហិរញ្ញវត្ថុអន្តរជាតិទៀតផង។ 

NCA បាននិយាយថា បណ្តាញ Smart ត្រូវបានប្រើប្រាស់ដើម្បីផ្តល់ហិរញ្ញប្បទានដល់សកម្មភាពចារកម្មរុស្ស៊ីនាពេលកន្លងមក។ ទាំងបណ្តាញ Smart និង TGR សុទ្ធតែពឹងផ្អែកយ៉ាងខ្លាំងលើគ្រីបតូ ដើម្បីជួយសម្រួលដល់ប្រតិបត្តិការរបស់ខ្លួន៕