ភ្នំពេញ ៖ សម្ដេចក្រឡាហោម ស ខេង ឧត្តមប្រឹក្សាផ្ទាល់ព្រះមហាក្សត្រ បានថ្លែងថា សម្ដេច នឹងស្ម័គ្រស្មោះធ្វើការលះបង់ កម្លាំងកាយ កម្លាំងចិត្ត និងកម្លាំងប្រាជ្ញាស្មាតី ដើម្បីរួមចំណែកបម្រើជាតិមាតុភូមិ ក្នុងស្មារតីផ្សះផ្សារជាតិ សុខសន្តិភាព និងភាពរុងរឿង។

តាមរយៈសារថ្លែងអំណរព្រះគុណរបស់ សម្ដេចក្រឡាហោម ស ខេង សូមក្រាបបង្គំទូលថ្វាយ ព្រះករុណា ព្រះបាទ សម្ដេចព្រះបរមនាថ នរោត្ដម សីហមុនី ព្រះមហាក្សត នៃព្រះរាជាណាចក្រកម្ពុជា ជាទីគោរពសក្ការៈដ៏ខ្ពង់ខ្ពស់បំផុត ដែលព្រះអង្គសព្វព្រះរាជហឫទ័យចេញព្រះរាជក្រឹត្យ ត្រាស់បង្គាប់តែងតាំង សម្ដេចក្រឡាហោម ជាឧត្ដមប្រឹក្សាផ្ទាល់ព្រះមហាក្សត្រ មានឋានៈស្មើឧបនាយករដ្ឋមន្ត្រី។

ជាការតបស្នងចំពោះព្រះរាជគុណូបការៈ និងព្រះរាជហឫទ័យដ៏ខ្ពង់ខ្ពស់បំផុតរបស់ ព្រះករុណា ជាអម្ចាស់ជីវិតលើត្បូង ទូលព្រះបង្គំជាខ្ញុំ សូមក្រាបបង្គំទូលថ្វាយថា «នឹងស្ម័គ្រស្មោះធ្វើការលះបង់កម្លាំងកាយ កម្លាំងចិត្ត និងកម្លាំងប្រាជ្ញាស្មាតី ដើម្បីរួមចំណែកបម្រើជាតិមាតុភូមិក្នុងស្មារតីផ្សះផ្សារជាតិ សុខសន្តិភាព និងភាពរុងរឿង»៕EB