វិបត្តិប្រេងឥន្ធនៈកំពុងកើនឡើងក្នុងប្រទេសឡាវ ខណៈអ្នកបើកបររថយន្តត្រូវតម្រង់ជួរយ៉ាងវែងដើម្បីចាក់សាំង
ឡាវ៖អ្នកបើកបររថយន្ត និងម៉ូតូតម្រៀបជាជួរយ៉ាងវែងដើម្បីចាក់សាំង ករណីនេះបានកើតឡើងយ៉ាងច្រើនទីតាំងតាមដងផ្លូវនៃទីក្រុងវៀងច័ន្ទ ប្រទេសឡាវក្នុងប៉ុន្មានថ្ងៃថ្មីៗនេះ ខណៈដែលប្រទេសនេះកំពុងតស៊ូជាមួយនឹងវិបត្តិប្រេងឥន្ធនៈដែលកំពុងកើនឡើង។ នេះបើតាមការចេញផ្សាយដោយសារព័ត៌មាន The Manila Time នៅថ្ងៃទី១១ ខែឧសភា ឆ្នាំ២០២២។
យោងតាមប្រព័ន្ធផ្សព្វផ្សាយរដ្ឋបានឱ្យដឹងថា ផ្នែកខ្លះនៃប្រទេសមួយនេះបានខ្វះខាតសាំងប្រើប្រាស់ ជាច្រើនសប្តាហ៍មកហើយ ប៉ុន្តែរដ្ឋធានីវៀងច័ន្ទគឺទើបតែចាប់ផ្តើមខ្សត់កាលពីថ្ងៃចន្ទប៉ុណ្ណោះ។
អ្នកនាំចូល និងចែកចាយប្រេងសាំង បានរងការវាយប្រហារដោយការធ្លាក់ចុះនៃរូបិយប័ណ្ណចាប់តាំងពីខែកញ្ញា រួមទាំងទុនបម្រុងរូបិយប័ណ្ណបរទេសទាប ស្របពេលដែល មានការកើនឡើងនៃតម្លៃប្រេង ដែលបណ្តាលមកពីសង្រ្គាមរុស្សី -អ៊ុយក្រែនជាង២ខែមកនេះ។
លោកស្រី Dara Khiosompon អ្នកគ្រប់គ្រងក្រុមហ៊ុន Settah Travel បានប្រាប់ទីភ្នាក់ងារសារព័ត៌មានបារាំង AFP កាលពីថ្ងៃអង្គារថា ក្រុមហ៊ុនរបស់លោកស្រីកំពុងជួបការលំបាកក្នុងការបំពេញរថយន្តទេសចរណ៍របស់ខ្លួន។"អ្នកបើកបររបស់យើងបានបើកឡានទៅស្ថានីយ៍ទីមួយដែលមានជួរវែង ល្មមតែដល់វេនគាត់ ប្រេងឥន្ធនៈក៏អស់ល្មម ដែលបណ្តាលឱ្យការបំរើសេវាកម្មជូនភ្ញៀវមានការលំបាក។
កាសែត Laotian Times បានរាយការណ៍ថា ខណៈដែលទីក្រុងវៀងចន្ទន៍ទើបតែចាប់ផ្តើមជួបប្រទះការខ្វះខាតប្រេងឥន្ធនៈក្នុងសប្តាហ៍នេះ ទីក្រុងភាគខាងជើងនៃខេត្តហ្លួងណាំថាបានអស់នៅចុងខែមីនា។
សូមបញ្ជាក់ថា ប្រទេសឡាវត្រូវការប្រេងចំនួន ១២០លានលីត្រក្នុងមួយខែ ប៉ុន្តែអ្នកនាំចូលមានលទ្ធភាពតែ២០លានលីត្រប៉ុណ្ណោះ។ប្រទេសឡាវបានផ្លាស់ប្តូរដើម្បីកាត់បន្ថយពន្ធលើប្រេងសាំងពី ៣១ ភាគរយមកត្រឹម ១៦ភាគរយ ហើយប្រទេសនៅអាស៊ីអាគ្នេយ៍មួយនេះកំពុងព្យាយាមស្វែងរកប្រភពប្រេងឥន្ធនៈដែលមានតំលៃថោកពីប្រទេសរុស្ស៊ី៕SP
