បរទេស ៖ លោកប្រធានាធិបតីអាមេរិក Joe Biden បានធ្វើ «ដំណើរ ជាប្រវត្តិសាស្ត្រ» ទៅកាន់តំបន់ព្រៃ Amazon ដើម្បីគូសបញ្ជាក់ពីការផ្តល់ហិរញ្ញប្បទានអាកាសធាតុទ្វេភាគី របស់អាមេរិក ដែលបានកើនឡើងដល់ ១១ ពាន់លានដុល្លារ នៅឆ្នាំនេះ បំពេញតាមការសន្យា ដែលលោកធ្លាប់បានធ្វើ។ នេះបើយោងតាមការចុះផ្សាយដោយទីភ្នាក់ងារ AFP នៅថ្ងៃទី១៨ វិច្ឆិកា ២០២៤។

សេតវិមានបាននិយាយ នៅក្នុងសេចក្តីថ្លែងការណ៍ថា «ការប្រយុទ្ធប្រឆាំងនឹងបម្រែបម្រួលអាកាសធាតុ គឺជាបុព្វហេតុកំណត់ នៃការដឹកនាំរបស់លោក Biden»។ លោកកំពុងជំរុញសកម្មភាពចុងក្រោយ តាមរយៈទស្សនកិច្ច នៅតំបន់អាមេរិកខាងត្បូង ពោលគឺបានទៅកាន់ព្រៃត្រូពិច ដ៏ធំល្វឹងល្វើយ មុនពេលប្រគល់តំណែងប្រធានាធិបតី ទៅឱ្យលោក Donald Trump ដែលជាអ្នកមិនប្រាកដ លើដំណោះស្រាយការប្រែប្រួលអាកាសធាតុ។

សេតវិមានបញ្ជាក់ថា ៦ដងមកហើយ ដែលអាណត្តិលោក Biden បានផ្តល់ហិរញ្ញប្បទានដោះស្រាយបញ្ហាអាកាសធាតុ តាំងពីឆ្នាំ២០២១។ យ៉ាងណាក៏ដោយ សហភាពអឺរ៉ុបនៅតែជាអ្នករួមចំណែកដ៏ធំបំផុត នៅលើពិភពលោក ក្នុងការផ្តល់ហិរញ្ញប្បទានអាកាសធាតុ។

គួរបញ្ជាក់ផងដែរថា «អាកាសធាតុ» នឹងក្លាយជាប្រធានបទមួយ ក្នុងចំណោមប្រធានបទចម្បងៗ នៅលើតុ G20 នៅប្រេស៊ីល។ ប្រហែលពាក់កណ្តាល នៃហិរញ្ញប្បទានអាកាសធាតុទាំងអស់ ឆ្លងកាត់មូលនិធិពហុភាគី ដែលគ្រប់គ្រងដោយប្រទេសកំពុងអភិវឌ្ឍន៍។ ប្រទេសអ្នកមានបានរៃអង្គាសប្រាក់ បានចំនួន ១១៦ពាន់លានដុល្លារ កាលពីឆ្នាំ២០២២ នេះបើយោងតាមទិន្នន័យចុងក្រោយបំផុត ពីអង្គការអន្តរជាតិ OECD៕