(ជប៉ុន)៖ បើតាមការបញ្ជាក់ពីប្រធានព្រឹត្តិការណ៍ Tokyo Olympics នាថ្ងៃអង្គារ បានអោយដឹងថា អ្នកសារព័ត៌មានបរទេស ដែលត្រូវទៅយកព័ត៌មាន នៅព្រឹត្តិការណ៍ Tokyo Olympics នាប្រទេសជប៉ុន នឹងត្រូវបានគេតាមដានលើការធ្វើដំណើររបស់ពួកគេ ដោយប្រព័ន្ធ GPS, ហើយថាអាចនឹងត្រូវដកហូតលិខិតឆ្លងដែន ប្រសិនបើពួកគេបំពានសេចក្តីសម្រេច។ នេះបើយោងតាមសារព័ត៌មាន CNA

ព្រឹត្តិការណ៍ Tokyo Olympics ដែលត្រូវបានពន្យារពេលមួយឆ្នាំ ដោយសារការរីករាលដាលជំងឺ, ដែលនឹងចាប់ផ្តើមនៅត្រឹមរយៈពេល៦សប្តាហ៍ទៀត ប្រធានព្រឹត្តិការណ៍ Tokyo Olympics បានធានាអះអាងជាសាធារណៈថា ព្រឹត្តិការណ៍ខ្នាតធំនេះ នឹងអាចធ្វើឡើងដោយសុវត្ថិភាព ស្ថិតក្រោមវិធានការការពារមេរោគយ៉ាងតឹងរឹង។

អ្នកសារព័ត៌មានប្រមាណ៦.០០០នាក់ ដែលនឹងធ្វើដំណើរទៅកាន់ជប៉ុន ដើម្បីចូលរួមយកព័ត៌មាន ក្នុងព្រឹត្តិការណ៍ Olympics នោះ ត្រូវតែផ្តល់ព័ត៌មានលម្អិត អំពីបញ្ជីនៃតំបន់ ដែលពួកគេនឹងធ្វើដំណើរទៅ សម្រាប់រយៈពេល២សប្តាហ៍ដំបូង ក្នុងប្រទេសជប៉ុន ដូចជា៖ ទីលានប្រកួតកីឡា និងសណ្ឋាគារជាដើម។

ជាមួយគ្នានោះ លោកស្រី Hashimoto ប្រធានព្រឹត្តិការណ៍ បានលើកឡើងមុនកិច្ចប្រជុំក្រុមប្រឹក្សាប្រតិបត្តិ Tokyo 2020 ថា «ដើម្បីកំណត់ថា ពួកគេមិនទៅកន្លែងផ្សេង ក្រៅពីកន្លែងដែលពួកគេបានចុះក្នុងបញ្ជី ដើម្បីទៅនោះ, យើងនឹងប្រើប្រាស់ GPS ដើម្បីគ្រប់គ្រងតឹងរឹង លើទង្វើររបស់ពួកគេ»។

គួរបញ្ជាក់ថា ក្រុមអត្តពលិក ក៏នឹងប្រឈមនឹងការរឹតបន្តឹងផងដែរ លើការធ្វើដំណើររបស់ពួកគេ ព្រមទាំងត្រូវធ្វើតេស្តជាប្រចាំថ្ងៃ ដើម្បីរកមេរោគ COVID-19។ អ្នកសារព័ត៌មាន នឹងត្រូវបង្ខំឲ្យស្នាក់នៅសណ្ឋាគារ ដែលគេបានកំណត់ជាជាងស្នាក់នៅដោយឯកជន៕RT