អាមេរិក៖ និយតករគ្រឿងញៀនសហរដ្ឋអាមេរិក (ហៅកាត់ FDA) កាលពីថ្ងៃសុក្រ បានបន្ថែមការព្រមានមួយ ចំពោះផ្លាកអក្សរ ដែលអមជាមួយវ៉ាក់សាំង Pfizer Inc (PFE.N) / BioNTech (22UAy.DE) និងវ៉ាក់សាំង Moderna (MRNA.O) ដើម្បីការពារហានិភ័យនៃបញ្ហារលាកបេះដូង បន្ទាប់ពីការប្រើប្រាស់វា។

ថ្នាំវ៉ាក់សាំងនីមួយៗ សន្លឹកអង្គហេតុសម្រាប់អ្នកផ្តល់សេវាថែទាំសុខភាព ត្រូវបានគេកែប្រែ (revised) ដើម្បីដាក់បញ្ចូលការព្រមានពីរបាយការណ៍នៃព្រឹត្តិការណ៍មិនល្អ បង្ហាញពីការកើនឡើងហានិភ័យនៃជំងឺរលាកសាច់ដុំបេះដូង និងជំងឺរលាកស្រោមបេះដូង ជាពិសេសក្រោយពេលចាក់លើកទី ២ និងចាប់ផ្តើមរោគសញ្ញាក្នុងរយៈពេលពីរបីថ្ងៃក្រោយការចាក់វ៉ាក់សាំង។ នេះបើយោងតាម និយតករគ្រឿងញៀនសហរដ្ឋអាមេរិក បានបញ្ជាក់បន្ថែម។

គិតត្រឹមថ្ងៃទី ១១ ខែមិថុនា មានករណីជំងឺរលាកសាច់ដុំបេះដូង និងជំងឺរលាកស្រោមបេះដូងជាង ១,២០០ ករណី ត្រូវបានរាយការណ៍ទៅប្រព័ន្ធរាយការណ៍អំពីវ៉ាក់សាំងអាមេរិច (ហៅកាត់ VAERS) ក្នុងចំណោមថ្នាំវ៉ាក់សាំងប្រហែល ៣០០ លាន mRNA ។

ករណីទាំងនេះហាក់ដូចជាមានអត្រាខ្ពស់ចំពោះបុរស និងក្នុងមួយសប្តាហ៍បន្ទាប់ពីការចាក់វ៉ាក់សាំងលើកទី ២ ។ មជ្ឃមណ្ឌលត្រួតពិនិត្យនិងបង្ការជំងឺ (ហៅកាត់ CDC) បានកំណត់អត្តសញ្ញាណមន្ទីរពេទ្យថាមានអ្នកជំងឺចំនួន ៣០៩ នាក់ លើបញ្ហានៃការរលាកបេះដូង ចំពោះមនុស្សដែលមានអាយុក្រោម ៣០ ឆ្នាំ ដែលក្នុងនោះដែរ ២៩៥ នាក់ ត្រូវបានអនុញ្ញាតិអោយទៅផ្ទះហើយ។

និយតករសុខភាពនៅក្នុងប្រទេសជាច្រើន បាននឹងកំពុងស៊ើបអង្កេតករណីនៃជំងឺរលាកសាច់ដុំបេះដូង និងរលាកស្រោមបេះដូង ដែលត្រូវបានគេរកឃើញជាញឹកញាប់ចំពោះបុរសវ័យក្មេង បន្ទាប់ពីការចាក់ថ្នាំ Pfizer ឬ Moderna ការចាក់វ៉ាក់សាំងដែលផ្អែកលើបច្ចេកវិទ្យា mRNA ។

គួររំលឹកថា នេះជាការធ្វើបច្ចុប្បន្នភាពចុងក្រោយពី FDA បន្ទាប់ពីមានការត្រួតពិនិត្យយ៉ាងទូលំទូលាយនៃព័ត៌មាននិងការពិភាក្សាដោយគណៈកម្មាធិការប្រឹក្សារបស់ CDC ស្តីពីការប្រតិបត្តិការចាក់ថ្នាំបង្ការនៅថ្ងៃពុធ។ ប៉ុន្តែ ក្រុមហ៊ុន Pfizer និង Moderna មិនបានឆ្លើយតបភ្លាមៗចំពោះសំណើសុំការអត្ថាធិប្បាយទេ បន្ទាប់ពីផុតម៉ោងធ្វើការ។ NR