ភ្នំពេញ ៖ អគ្គនាយកដ្ឋានពន្ធនាគារ បានឲ្យដឹងថា គិតត្រឹមឆ្នាំ២០២២ កន្លងទៅ អ្នកជាប់ពន្ធនាគារនៅទូទាំងប្រទេសកម្ពុជា ចំនួន ៣៧.៨៤០នាក់ ក្នុងនោះ ភាគច្រើនអ្នកប្រព្រឹត្តិបទល្មើសគ្រឿងញៀន ចំនួន ៥២,៨២%។

នេះបើយោងតាមរបាយការណ៍ ស្ដីពីលទ្ធផលការងារឆ្នាំ២០២២ និងលើទិសដៅការងារឆ្នាំ២០២៣ របស់អគ្គនាយកដ្ឋានពន្ធនាគារ បានបង្ហាញក្នុងពិធីបើកសន្និបាតផ្សព្វផ្សាយទិសដៅការងារឆ្នាំ២០២៣ របស់ក្រសួងមហាផ្ទៃ និងលទ្ធផលការងារឆ្នាំ២០២២ របស់អគ្គនាយកដ្ឋានពន្ធនាគារ ក្រោមអធិបតីភាព លោក ប៉ាវ ហមផាន រដ្ឋលេខាធិការ ក្រសួងមហាផ្ទៃ ដោយមានការអញ្ជើញចូលរួមពី លោកឧត្តមអគ្គានុរក្សថ្នាក់លេខ១ ឆែម សាវុធ អគ្គនាយកដ្ឋានពន្ធនាគារ នាព្រឹកថ្ងៃទី១៧ ខែមីនា ឆ្នាំ២០២៣។

ក្នុងរបាយការណ៍របស់ អគ្គនាយកដ្ឋានពន្ធនាគារ បានបញ្ជាក់ថា «ចំនួនជនជាប់ឃុំគិតត្រឹមថ្ងៃទី១០ ខែធ្នូ ឆ្នាំ២០២២ សរុប ៣៧.៨៤០នាក់ ក្នុងនោះមាន៖ ជនបរទេស ១.៧៧១នាក់, អនីតិជន ១.៦៤៥នាក់, ស្ត្រីមានផ្ទៃពោះ ២៦នាក់, កូនតាមម្ដាយ ១០៩នាក់ ពិការ ៤៤២នាក់»។

របាយការណ៍ ដដែលបន្ដថា បទល្មើសភាគច្រើន គឺគ្រឿងញៀនស្មើនឹង ៥២,៨២%, បទល្មើសលួចមានស្ថានទម្ងន់ទោស ១០,១៥%, បទល្មើសលួច ៨,២៧%, រំលោភសេពសន្ថវៈ ៦,១៧%, បទល្មើសឃាតកម្ម ៥,៧៥% និងបទល្មើសផ្សេងៗ ទៀតមាន ១៦,៨៦%។

ប្រភព ដដែល បានឱ្យដឹងទៀតថា ចំពោះការងារការពារសន្តិសុខពន្ធនាគារ បានបង្កើនការយកចិត្តទុកដាក់ និងពង្រឹងប្រសិទ្ធភាពក្នុងការត្រួតពិនិត្យឆែកឆេរ បង្ការទប់ស្កាត់ការរត់គេច ការប៉ុនប៉ងលួចលាក់នាំចូលក្នុងពន្ធនាគារនូវវត្ថុសម្ភារៈហាមឃាត់ រកឃើញ និងដកហូត រួមមាន៖ ត្រួតពិនិត្យ ឆែកឆេរ ចំនួន ៤៧លើក និងរកឃើញដកហូតបានទូរស័ព្ទដៃ ២៩គ្រឿង និងម្សៅក្រាមសថ្លា ១កញ្ចប់ នៅពន្ធនាគារខេត្តកំពង់ឆ្នាំង និងព្រះវិហារ (ពុំមានរកឃើញអ្វី) ពន្ធនាគាររាជធានីភ្នំពេញ ២គ្រឿង ព្រៃវែង ៥គ្រឿង ស្ទឹងត្រែង ២គ្រឿង និងសៀមរាប ២០គ្រឿង និងម្សៅក្រាមសថ្លា ១កញ្ចប់។

ចំពោះ ករណីរត់រួចខ្លួន ចំនួន ៣ករណី ៥នាក់ នៅពន្ធនាគារខេត្តកោះកុង អំឡុងពេលចេញធ្វើពលកម្មជាប់ របងកំផែងពន្ធនាគារ ១នាក់ នៅពន្ធនាគាររាជធានីភ្នំពេញ អំឡុងពេលសំរាកព្យាបាលនៅមន្ទីរពេទ្យរុស្ស៊ី ១នាក់ និងនៅពន្ធនាគារខេត្តក្រចេះ អំឡុងពេលធ្វើចត្តាឡីស័ក ៣នាក់៕EB