(ចិន)៖បុគ្គលិកសង្គ្រោះជាង 5,000 នាក់ រួមទាំងអ្នកពន្លត់អគ្គីភ័យ កងកម្លាំងប្រដាប់អាវុធ និងក្រុមជួយសង្គ្រោះជំនាញ ព្រមទាំងឧទ្ធម្ភាគចក្រចំនួន 7 ត្រូវបានចល័តដើម្បីពន្លត់ភ្លើង។ ខណៈមនុស្សជាង 1,500 នាក់ត្រូវបានជម្លៀសទៅកាន់កន្លែងមានសុវត្ថិភាព។រហូតមកដល់ពេលនេះ មិនមានអ្នកស្លាប់និងរបួសត្រូវបានគេរាយការណ៍ឡើយ។នេះបើតាមសេចក្តីរាយការណ៍ដោយទីភ្នាក់ងារសារព័ត៌មាន People's Daily China នៅថ្ងៃទី២២ ខែសីហា ឆ្នាំ២០២២។
គ្រោះរាំងស្ងួតជាបន្តបន្ទាប់ និងរលកកំដៅបានបណ្តាលឱ្យមានភ្លើងឆេះព្រៃជាច្រើននៅតំបន់ភ្នំនៃក្រុង Chongqing ភាគនិរតីនៃប្រទេសចិន ។ផ្នែកធំនៃប្រទេសចិនបានជួបប្រទះនឹងរលកកំដៅនាពេលថ្មីៗនេះ។ ដូចជា ទីក្រុង Chongqing កំពុងជួបប្រទះអាកាសធាតុក្តៅខ្លាំងបំផុត ចាប់តាំងពីឆ្នាំ 1961។
ក្រុមសង្កេតការណ៍ជាតិរបស់ប្រទេសចិនកាលពីថ្ងៃអាទិត្យបានបន្តចេញការជូនដំណឹងពណ៌ក្រហមសម្រាប់សីតុណ្ហភាពខ្ពស់ដែលជាការព្រមានធ្ងន់ធ្ងរបំផុតនៅក្នុងប្រព័ន្ធព្រមានបួនកម្រិតរបស់ខ្លួន។ នេះជាថ្ងៃទី ១០ ជាប់គ្នាហើយដែលមជ្ឈមណ្ឌលជាតិឧតុនិយមបានចេញការប្រកាសអាសន្នពណ៌ក្រហមសម្រាប់សីតុណ្ហភាពឡើងខ្ពស់។យោងតាមរដ្ឋបាលឧតុនិយមចិន បានឱ្យដឹងថា រលកកំដៅដែលកំពុងបន្តត្រូវបានព្យាករណ៍ថានឹងថយចុះបន្តិចម្តងៗ ចាប់ពីថ្ងៃទី 26 ខែសីហា៕
