(បាងកក)៖ សាកសពមនុស្សចំនួន៦នាក់ផ្សេងទៀតក្នុងចំណោមអ្នកបាត់ខ្លួនទាំង៣០នាក់ ត្រូវបានរកឃើញកាលពីថ្ងៃអង្គារទី២០ខែធ្នូម្សិលមិញ ខណៈនាវិកម្នាក់ត្រូវបានជួយសង្គ្រោះ បន្ទាប់ពីនាវាចម្បាំងថៃមួយគ្រឿង ឈ្មោះ សុខោទ័យ បានលិចក្នុងសមុទ្រអំឡុងពេលព្យុះ។នេះបើតាមសេចក្តីរាយការណ៍ដោយទីភ្នាក់ងារសារព័ត៌មាន Bangkok Post នៅព្រឹកថ្ងទី២១ ខែធ្នូ ឆ្នាំ២០២២។
អ្នកនាំពាក្យកងទ័ពជើងទឹកថៃ ឧត្តមនាវី Pokkrong Monhatpalin បាននិយាយថា កងទ័ពជើងទឹកឥឡូវនេះ កំពុងផ្តោតលើការជួយសង្គ្រោះនាវិកចំនួន ២៣នាក់ដែលនៅសល់ ។លោកបន្ថែមថា នាវិកនិងកងម៉ារីនចំនួន៣១នាក់ក្នុងចំណោម១០៦នាក់ ត្រូវបានរាយការណ៍ថា បាត់ខ្លួន។ បន្ទាប់មក នាវិកម្នាក់ត្រូវបានជួយសង្គ្រោះដោយនាវា HTMS Kraburi នៅខេត្ត Prachuap Khiri Khan។
បើតាមមេទ័ពជើងទឹក ឧត្តមនាវីឯក Choengchai Chomchoengpaet បានសម្ដែងការសោកស្ដាយយ៉ាងខ្លាំងចំពោះអ្នកស្លាប់ និងចូលរួមរំលែកទុក្ខដល់ក្រុមគ្រួសាររបស់ពួកគេ។លោកនិយាយថា ការស៊ើបអង្កេតស្វែងរកការពិត នឹងចាប់ផ្តើមឡើង រួមទាំងពិនិត្យរបាយការណ៍អំពីចំនួនអាវពោងការពារជីវិតមិនគ្រប់គ្រាន់នៅលើនាវាផងដែរ។សាកសពកំពុងត្រូវបានបញ្ជូន ដើម្បីកំណត់អត្តសញ្ញាណជាផ្លូវការ ហើយកងទ័ពជើងទឹកនៅតែសង្ឃឹមថា នឹងរកឃើញអ្នកនៅរស់បន្ថែមទៀត៕
