អ្នកនាំពាក្យក្រសួងការបរទេសចិន ហៅអាមេរិកថា «ជើងកាង» ជាការវាយបកពីអ្នកសម្របសម្រួលក្រុមប្រឹក្សាសន្តិសុខជាតិប្រចាំតំបន់ឥណ្ឌូ-ប៉ាស៊ីហ្វិក
ចិន៖ លោក Wang Wenbin អ្នកនាំពាក្យក្រសួងការបរទេសចិនបានវាយបកការអត្ថាធិប្បាយពីអ្នកសម្របសម្រួលក្រុមប្រឹក្សាសន្តិសុខជាតិប្រចាំតំបន់ឥណ្ឌូ-ប៉ាស៊ីហ្វិកដែលថា ប្រទេសចិនប្រតិកម្មហួសហេតុចំពោះដំណើរទស្សនកិច្ចរបស់លោកស្រី Nancy Pelosi ទៅកាន់កោះតៃវ៉ាន់កាលពីថ្ងៃទី២ ខែសីហាកន្លងទៅនេះ។នេះបើយោងតាមសេចក្តីរាយការណ៍ដោយទីភ្នាក់ងារសារព័ត៌មាន AFP នៅថ្ងៃទី១៨ ខែសីហា ឆ្នាំ២០២២។
អ្នកនាំពាក្យក្រសួងការបរទេសចិនលោក Wang Wenbin បាននិយាយអំឡុងសន្និសីទសារព័ត៌មានមួយកាលពីថ្ងៃពុធថា យោងតាមសំឡេងដែលបានថតទុក វាច្បាស់ណាស់ថា សហរដ្ឋអាមេរិកកំពុងព្យាយាមការពារអ្វីដែលមិនអាចការពារបាន ដោយការអនុវត្តន៍ហេតុផលបែបទំនើង និងធ្វើដូចជាជើងកាង។
ប្រទេសចិនទំនងជាសងសឹកកោះតៃវ៉ាន់ ចំពោះដំណើរទស្សនកិច្ចរបស់លោកស្រី Pelosi តាមរយៈមធ្យោបាយមួយចំនួនរួមទាំងសមយុទ្ធយោធាក្នុងច្រកសមុទ្រតៃវ៉ាន់ និងបម្រាមលើការនាំចូលចូលដ៏សំខាន់ពីកោះស្វ័យគ្រប់គ្រងមួយនេះ។
គួរបញ្ជាក់ថា លោក Campbell បាននិយាយអំឡុងពេលថតសំឡេងតាមទូរស័ព្ទកាលពីសប្ដាហ៍មុនថា ប្រទេសចិនមានប្រតិកម្មជ្រុលហួសហេតុ ហើយសកម្មភាពដែលនៅតែបន្តរបស់ខ្លួននឹងក្លាយជាការបង្ករឿង បង្កអស្ថិរភាព និងជាសកម្មភាពមិនធ្លាប់មានពីមុនមក៕
