ដោយសារតែមានការត្អូញត្អែរពីអតិថិជនទាក់ទងនឹងបញ្ហាកាត់លុយតាមទូរស័ព្ទដោយពុំដឹងមូលហេតុ ឬការភ្ជាប់សេវាកម្មផ្សេងៗដោយ​មិនដឹង​ខ្លួន ក្រសួងប្រៃសណីយ៍ និងទូរគមនាគមន៍ បានជំរុញឲ្យនិយ័តករទូ​រគម​នាគមន៍កម្ពុជា(TRC) សហការជាមួយប្រតិបត្តិករទូរស័ព្ទចល័តទាំងអស់ ពន្លឿនការអនុវត្តលេខកូដរួមមួយ ដែលបានបង្កើតរួចហើយ ដើម្បីឲ្យអ្នក​ប្រើប្រាស់ អាចពិនិត្យនិងផ្តាច់សេវាកម្មបន្ថែម ដែលបានភ្ជាប់ ដោយចៀ​សវាងការកាត់លុយជាស្វ័យប្រវត្តិតទៅទៀត ដែលធ្វើឲ្យប៉ះពាល់​ដល់ផល​ប្រយោជន៍របស់អតិថិជន។

អ្នកនាំពាក្យនិយ័តករទូរគមនាគមន៍កម្ពុជាឯកឧត្តម អ៊ឹម វុត្ថា បានបញ្ជាក់​ប្រាប់​សារព័ត៌មានក្នុងស្រុកថា និយ័តករទូរគមនាគមន៍កម្ពុជា បានពិ​ភាក្សា និងសហការជាមួយនឹងបណ្តាប្រតិបត្តិករទូរសព្ទចល័តទាំងអស់ ក្នុងការពន្លឿនអនុវត្តលេខកូដ១២០០រួចរាល់ហើយ ដែលអាចនឹង​ដាក់​ដំណើរនៅពាក់កណ្តាលខែមិថុនា ដើម្បីកាត់ផ្តាច់ប្រព័ន្ធផ្សេងៗ​ដែលអតិ​ថិជនមិ​នពេញចិត្ត។

ឯកឧត្តម អ៊ឹម វុត្ថា បានបញ្ជាក់បន្ថែមថា និយ័តករទូរគមនាគមន៍កម្ពុជានឹ​ងបញ្ជាក់ពីបច្ចេកទេសដើម្បីចុចផ្តាច់សេវាផ្សេងៗនៅពេលដែលក្រសួងដាក់ឲ្យដំណើរការជាផ្លូវការ ហើយនៅពេលដាក់ឲ្យដំណើរការ គេនឹង​ណែនាំពីរបៀបប្រើ ចំណេលបច្ចេកទេសវិញគឺមិនស្មុគស្មាញច្រើនទេ គ្រាន់តែចុច១២០០ គឺផ្តាច់សេវាបានតែម្តង។

ស្របពេលនៃការពន្លឿនការដាក់ឲ្យដំណើរការលេខកូដរួមមួយ ដើម្បី​អោយអ្នកប្រើប្រាស់ប្រព័ន្ធទូរស័ព្ទទាំងអស់អាចផ្តាច់សេវាផ្សេងៗបានដោយខ្លួនឯង​នោះ ក្រសួងប្រៃសណីយ៍ និងទូរគមនាគមន៍ ក៏បានស្នើឲ្យអ្ន​កប្រើ​ប្រាស់ គួរយល់ដឹងអំពីទំហំកញ្ចប់សេវាដែលខ្លួនទទួល និងសុព​លភាព លើការប្រើប្រាស់សេវាកម្ម និងសេវាបន្ថែមរបស់បណ្ដា​ក្រុមហ៊ុ​ននីមួយៗឲ្យបានច្បាស់លាស់ នៅពេលមានការភ្ជាប់គម្រោងផ្សេងៗ ការផ្លាស់ប្តូរគម្រោង ការប្តូរលុយ សេវា Calltune សេវាឆ្នោត (Lottery) សេវាហោរាសាស្ដ្រ សេវាស្ដាប់ចម្រៀង (Music) លទ្ធផលព័ត៌មានកីឡា (Sport) សេវាខ្ចីប្រាក់មុនពីក្រុមហ៊ុន (Loan) និងសេវាហៅចេញដោយ​មិនបញ្ចេញ​លេខ (Private Number)ជាដើម ហើយក្រសួងក៏អំពាវ​នាវដល់​អ្នកប្រើប្រាស់ទាំងអស់ មុននឹងតភ្ជាប់សេវាកម្មណាមួយ គប្បីមា​នការប្រុងប្រយ័ត្ននិងពិនិត្យឲ្យបានច្បាស់លាស់៕SP