(ភ្នំពេញ)៖ រដ្ឋលេខាធិការក្រសួងការងារ និងបណ្តុះបណ្តាលវិជ្ជាជីវៈ លោក ហេង សួរ បានអោយដឹងថា នៅត្រីមាសទី៤ ឆ្នាំ២០២២នេះ ការនាំចេញវិស័យឧស្សាហកម្មកាត់ដេរអាចនឹងធ្លាក់ចុះប្រមាណ១០ភាគរយ ដោយសារវិបត្តិសង្គ្រាមរវាងរុស្ស៉ី និង អ៊ុយក្រែន។ លើកឡើងក្នុងសន្និសីទសារព័ត៌មានស្ដីពីសមិទ្ធផលសម្រេចបានរយៈពេល៥ឆ្នាំកន្លងមករបស់ក្រសួងការងារនិងបណ្ដុះបណ្ដាលវិជ្ជាជីវៈ ដែលរៀបចំឡើងដោយអង្គភាពអ្នកនាំពាក្សរាជរដ្ឋាភិបាល នៅទីស្តីការគណៈរដ្ឋមន្រ្តី នាថ្ងៃទី១២ ខែតុលា ឆ្នាំ២០២២ នេះ លោក ហេង សួរ បានមានប្រសាសន៍ថា បើយើងយកឆ្នាំធៀបនឹងឆ្នាំ ប្រហែលជាឃើញកំណើននៃការនាំចេញវិស័យកាត់ដេរ អាចធ្លាក់ចុះក្រោម១០ភាគរយ ប៉ុន្តែបើគិតត្រឹមត្រីមាសទី១ រហូតដល់ទី៣ កំណើននាំចេញនេះធ្លាក់ចុះលើស១០ភាគរយ។ ឯកឧត្តមបញ្ជាក់ថា ការធ្លាក់ចុះនេះ ដោយសារវិបត្តិសង្គ្រាមនៅរុស្ស៊ីនិងអ៊ុយក្រែន ដែលធ្វើឱ្យអត្រាអតិផរណានៅអាមេរិក និងអឺរ៉ុប មានការកើនឡើងខ្លាំង ដោយការចំណាយរបស់ពលរដ្ឋនៅទីនោះ ផ្តោតសំខាន់ទៅលើប្រេងឥន្ធនៈ ថាមពល និងអគ្គិសនី។ ដូច្នេះហើយទើបធ្វើឱ្យមានការកាត់បន្ថយការប្រើប្រាស់សម្លៀកបំពាក់ឬកាត់បន្ថយការបញ្ជាទិញពីម្ចាស់ម៉ាកនានា។